З 1 па 31 кастрычніка ў зале беларускай літаратуры (пам. 205) праходзіць выстаўка “Трываласць жыццёвай пазіцыі”, прысвечаная 75-годдзю з дня нараджэння беларускага пісьменніка Валянціна Блакіта (1938–2007).
Творчая спадчына Валянціна Блакіта (сапр. Болтач Валянцін Уладзіміравіч) – аповесці “Час прылёту журавоў”, “Шануй імя сваё”, “Усмешка фартуны”, “Вырай”, “Адчай”, “Вяселле ў Беражках”, “Чуйная цішыня”, апавяданні, вершы, нататкі і гумарэскі.
У вострасацыяльных, глыбока маральных творах пісьменніка па-мастацку даследавана жыццё сучасніка, яго маральны воблік. У іх аўтар узняў праблемы духоўнай спадчыны, асабістай адказнасці чалавека перад сабой і сваім часам. Адметнай рысай твораў з’яўляецца тое, што “населены” яны характарамі актыўнымі, драматычнымі, з самай гушчы жыцця, якія шукаюць існасць быцця, адстойваюць чалавечую годнасць, праўду, справядлівасць – спрадвечныя маральныя вартасці.
Творчасць В. Блакіта атрымала высокую адзнаку беларускіх і расійскіх крытыкаў і пісьменнікаў. Васіль Быкаў у прадмове да другога выдання кнігі аповесцей “Чти имя своё”, надрукаванай выдавецтвам “Молодая гвардия” ў 1988 г., адзначыў: “...рэалізм у стварэнні жыццёва ёмістых характараў разам са значнасцю праблематыкі аповесцей Валянціна Блакіта робяць іх вельмі надзённымі ў беларускай літаратуры...”; а адзін з рускіх крытыкаў паставіў яго аповесці побач з творамі, што спрыялі перабудове мыслення людзей.
Выстаўка складаецца з двух раздзелаў: “Маральнасць і духоўнасць – галоўныя тэмы творчасці В. Блакіта” і “В. Блакіт і «Вожык»: 13 гадоў разам”. На ёй прадстаўлены ўсе кніжныя выданні аповесцей пісьменніка, іх публікацыі ў зборніках і беларускіх перыядычных выданнях. Сярод дакументаў экспазіцыі – успаміны “Уваскрасеньне ўчарашняга дня”, над якімі Валянцін Уладзіміравіч працаваў у апошнія гады жыцця. Яны выдадзены часопісам “Дзеяслоў” (2007, № 6; 2008 № 1–5).
Дапаўняюць выстаўку кнігі з водгукамі на творы пісьменніка і асобныя нумары часопіса “Вожык”.
Кантактны тэлефон: (8 017) 293 27 16.