З 8 па 25 красавіка ў зале беларускай літаратуры (пам. 205) дэманструецца юбілейная выстаўка “След на зямлі”, прысвечаная 90-годдзю з дня нараджэння беларускага пісьменніка, публіцыста Аляксея Нічыпаравіча Карпюка.
Заслужаны работнік культуры (1980), лаўрэат Літаратурнай прэміі імя І. Мележа (1986) Аляксей Карпюк – каларытная постаць айчыннай літаратуры, чалавек незвычайнай біяграфіі, які перажыў і прайшоў усё, што лёс наканаваў яго пакаленню. У літаратуру ён прыйшоў асобай загартаванай: за плячыма быў вялікі жыццёвы вопыт. Стаў пісьменнікам, чыя творчасць народжана жыццём: яго творы багатыя на рэальныя сітуацыі, падзеі і факты.
У экспазіцыі шырока прадстаўлена літаратурная спадчына А.Н. Карпюка, якую складаюць двухтомныя зборы твораў (1980 і 1991), зборнікі аповесцей і апавяданняў “Дзве сасны” (1958), “Свежая рыба” (1978), “Партрэт” (1983), кнігі нарысаў “Мая Гродзеншчына” (1960), “След на зямлі”(1972), аповесці “Данута” (1960), ”Пушчанская адысея” (1964), “Белая дама” (1992), раман-быль “Вершалінскі рай” (1974), сацыяльна-псіхалагічны раман “Карані” (1988), кніга эсэ, апавяданняў, дзённікаў “Развітанне з ілюзіямі” (2008). З гэтымі і іншымі кнігамі знаёміць першы блок выстаўкі “Пясняр роднага краю”.
У раздзел “Праўдзіваю мовай жыцця” ўвайшлі творы аўтара, надрукаваныя ў калектыўных зборніках і перыядычных выданнях, у тым ліку публікацыя першай аповесці “У адным інстытуце” (1953).
Літаратурная спадчына Аляксея Карпюка, перакладзеная на іншыя мовы, складае асобны раздзел экспазіцыі “Адкрытасць і шчырасць”.
Яшчэ адна частка выстаўкі цалкам прысвечана асобе пісьменніка. У ёй сабраны матэрыялы пра жыццёвы шлях Аляксея Карпюка, прадстаўлены працы такіх даследчыкаў яго творчасці, як В. Каваленка, С. Андраюк, П. Дзюбайла, У. Калеснік і інш.
Кантактны тэлефон: 293-27-16.
 |
 |
 |
 |
