10 снежня 2023 года Прэзідэнцкай бібліятэцы Рэспублікі Беларусь споўнілася 90 гадоў з дня заснавання. Напярэдадні знакавай даты, 8 снежня, калектыў бібліятэкі быў удастоены шматлікіх узнагарод і віншаванняў ад прадстаўнікоў дзяржаўных органаў, міністэрстваў і ведамстваў, а таксама замежных калег і партнёраў у зале пасяджэнняў Савета міністраў Рэспублікі Беларусь.
У гонар юбілею Кіраўнік дзяржавы даў даручэнне перадаць у фонд Прэзідэнцкай бібліятэкі ўнікальны падарунак – калекцыю кніг з асабістага фонду. Калекцыя ўключае больш за 160 выданняў. У ёй прадстаўлены рэдкія кнігі XIX стагоддзя, а таксама сучасныя выданні – факсімільнае ўзнаўленне старажытных пісанняў, фаліянты, альбомы, падарункавыя выданні.
Атрыманыя кнігі не толькі папоўнілі фонды бібліятэкі, але і пашырылі магчымасці чытачоў для працы з рэдкімі кнігамі. Сярод іх:
- рэпрынтныя выданні атласаў з унікальнай інфармацыяй аб рэгіёнах Беларусі
- “Белорусские народные песни, с относящимися к ним обрядами, обычаями и суевериями” – каштоўнае выданне з аўтографам вучонага і этнографа Паўла Шэйна
- “Белорусский архив древних грамот”, у якім змешчана больш за 50 дакументаў XVI–XVIII стагоддзяў па гісторыі ўсходніх зямель Беларусі. Зборнік быў выдадзены на высокім для таго часу археаграфічным узроўні і прыадчыніў заслону над амаль невядомай шматвяковай трагічнай і гераічнай гісторыяй старажытнай Беларусі
- чатырохтомнае элітнае перавыданне знакамітай кнігі мемуараў (успамінаў і разважанняў) легендарнага маршала Савецкага Саюза Георгія Жукава і інш.
Сярод сучасных выданняў, прадстаўленых у экспазіцыі, мастацкая, эканамічная і навуковая літаратура, кнігі па мастацтве, сусветнай гісторыі і сучаснасці, кнігі, прысвечаныя спорту і турызму, духоўнай спадчыне, а таксама Вялікай Айчыннай вайне і генацыду.
Значную частку калекцыі склалі кнігі аб развіцці самых розных напрамкаў дзейнасці краін – удзельніц Садружнасці Незалежных Дзяржаў. Цікавым выданнем дадзенай калекцыі з’яўляецца кніга “Москва”, у якой раскрываецца прыгажосць сталіцы Расіі. Роўна як і большасць экспануемых кніг, выданне выканана ў адпаведнасці з лепшымі ўзорамі мастацкага, паліграфічнага і дызайнерскага афармлення кнігі.
Бібліяграфічную каштоўнасць і ўнікальнасць шматлікім выданням надалі пакінутыя ў іх аўтографы і дароўныя надпісы, арыгінальныя пераплёты, дызайнерскія супервокладкі і падарункавыя каробкі.
Прэзідэнцкая бібліятэка перадала дадзеную калекцыю Нацыянальнай бібліятэцы для часовага экспанавання. Выстава зацікавіць шырокае кола аматараў кнігі.
Экспазіцыя будзе працаваць у выставачным комплексе (пам. 104) бібліятэкі з 30 студзеня па 15 лютага з 10.00 да 18.00.
Дата заканчэння яе працы можа быць зменена.
Уваход – па чытацкім білеце або білеце сацыякультурнага цэнтра.
Матэрыял пададзены аддзелам галерэйна-выставачнай дзейнасці.
