З 18 лютага па 3 сакавіка ў Нацыянальнай бібліятэцы Беларусі (2-гі паверх, кальцавы калідор) ладзіцца выстаўка “Гімн мужнасці”, прысвечаная Дню абаронцаў Айчыны і Узброеных Сіл.
Дзень абаронцы Айчыны, або па-старому Дзень Савецкай Арміі і Ваенна-Марскога флота, быў спрадвечна савецкім святам, якое адзначалася на дзяржаўным узроўні. Гісторыя свята налічвае ўжо каля 100 гадоў і бярэ свой пачатак у 1918 годзе, калі 23 лютага сталі святкаваць як дзень нараджэння Чырвонай Арміі.
Для сучаснага чалавека гэтае свята – дзень памяці ўсіх воінаў, якія баранілі краіну ва ўсе часы. Гэта ўсенароднае свята, калі ўшаноўваюць тых, хто служыў і служыць ва Узброеных Сілах, і тых, хто яшчэ толькі рыхтуецца выканаць свой абавязак перад Айчынай.
На тэматычнай кніжнай выстаўцы “Гімн мужнасці” прадстаўлена больш за 150 дакументаў пра ваеннае майстэрства, віды ўзбраення, гісторыю і сучасны стан Узброеных Сіл Рэспублікі Беларусь.
У экспазіцыі прадстаўлены выданні, падрыхтаваныя Міністэрствам абароны Рэспублікі Беларусь: кніга “Вооруженные Силы Республики Беларусь: 90 лет на страже Отечества”; электроннае выданне “Вооруженные Силы Республики Беларусь: новейшая история белорусской армии” на 12-ці дысках; паэтычны зборнік “Мы храним тебя, Беларусь!”; часопіс “Армия” і яго літаратурна-мастацки дадатак “Армия и культура”.
Таксама на выстаўцы экспануецца шэраг даведачна-інфармацыйных выданняў ваеннай тэматыкі: энцыклапедычны слоўнік “Военное дело” Ф. А. Бракгаўза і І. А. Ефрона, у якім гэтая тэма асвятляецца з глыбокай старажытнасці да XX ст., і рэпрынтнае шматтомнае выданне “Военная энциклопедия” 1911 г., выпушчанае знакамітай пецярбургскай друкарняй “Товарищество И. Д. Сытина”, сучасныя ваенныя энцыклапедычныя і тлумачальныя слоўнікі, а таксама навукова-папулярнае выданне “История войн” пра развіццё ваеннага майстэрства ад антычнасці да ХХІ ст.
Гэтыя і многія іншыя выданні дадуць чытачам максімальна дакладную інфармацыю пра гісторыю і сучасныя пераўтварэнні беларускай арміі, будуць спрыяць ваенна-патрыятычнаму выхаванню моладзі, паслужаць умацаванню незалежнасці, магутнасці і росквіту нашай Радзімы.
Кантактны тэлефон: 293-28-86.
Увага! У чытальных залах арганізаваны доступ да поўных спісаў літаратуры, прадстаўленай на выстаўках, якія ладзяцца ў бібліятэцы.