17 лютага ў галерэі “Панарама” ў рамках Года Украіны ў Рэспубліцы Беларусь адбылося адкрыццё выстаўкі ўкраінскай мастачкі Наталлі Палішчук “Я адчуваю цябе”.
Арганізатары выстаўкі – Нацыянальная бібліятэка Беларусі, Пасольства Украіны ў Рэспубліцы Беларусь, Львоўскае аддзяленне Нацыянальнага саюза мастакоў Украіны, Міжнародная Кірыла-Мяфодзіеўская акадэмія славянскай асветы.
Жывапіс Наталлі Палішчк – гэта дынамічны сплаў фарбаў і формаў, аголенасць пачуццяў. Асаблівасцю яе палотнаў з’яўляецца наяўнасць экспрэсіяністычных тэндэнцый, якія выяўляюцца праз сукупнасць нібы выпадковых мазкоў, арганізаваных у маляўнічую прастору, якія нараджаюць зразумелыя і блізкія сучаснаму гледачу вобразы.
Адкрылі вернісаж дырэктар Нацыянальнай бібліятэкі Беларусі Раман Матульскі і Надзвычайны і Паўнамоцны Пасол Украіны ў Рэспубліцы Беларусь Раман Бязсмертны. У мерапрыемстве ўзялі ўдзел куратар праекта, загадчык галерэйна-выставачнага аддзела Нацыянальнай бібліятэкі Беларусі Фёдар Ястраб; старшыня беларускага аддзялення Міжнароднай Кірыла-Мяфодзіеўскай акадэміі славянскай асветы Любоў Шумская; прадстаўнікі ўкраінскай дыяспары, дыпламатычнага корпуса, творчай інтэлігенцыі Украіны і Беларусі. Маладая і таленавітая ўкраінская мастачка Наталля Палішчук падзякавала арганізатарам выстаўкі за дапамогу і падтрымку і падарыла спадару Матульскаму і спадару Бязсмертнаму свае работы.
Выстаўка будзе доўжыцца да 9 сакавіка ў галерэі “Панарама” (22-гі паверх, закрытая аглядная пляцоўка). Уваход на выстаўку платны і складае кошт наведвання агляднай пляцоўкі.