З 18 лютага па 3 сакавіка ў Нацыянальнай бібліятэцы Беларусі (2-гі паверх, кальцавы калідор) ладзіцца выстаўка “Гімн мужнасці”, прысвечаная Дню абаронцаў Айчыны і Узброеных Сіл.
На тэматычнай кніжнай выстаўцы “Гімн мужнасці” прадстаўлена больш за 100 дакументаў пра ваеннае майстэрства, віды ўзбраення, гісторыю і сучасны стан Узброеных Сіл Рэспублікі Беларусь.
Ганаровае месца ў экспазіцыі займаюць падшыўкі газеты Міністэрства абароны Рэспублікі Беларусь “Белорусская военная газета”. Сёлета спаўняецца 90 гадоў з дня выпуску першага нумара гэтага друкаванага выдання, заснаванага 22 чэрвеня 1921 года. Аснову зместу газеты складае інфармацыя пра жыццё краіны, пра ход рэфармавання Узброеных Сіл, перспектывы развіцця ваенна-прамысловага комплексу. За ўсе гады выдання ў рэдакцыі працавалі такія вядомыя пісьменнікі, як Аляксей Суркоў, Вадзім Кажэўнікаў, Яўген Вараб’ёў, Міхась Лынькоў, мастак Арэст Вярэйскі. З 1942 года і да канца вайны на старонках газеты публікавалася паэма Аляксандра Твардоўскага “Василий Теркин”. Рэдакцыйнаму калектыву ўручаны Баявы Чырвоны Сцяг, газета ўзнагароджана ордэнам Чырвонай Зоркі.
Асобным блокам у экспазіцыі прадстаўлены шэраг даведачна-інфармацыйных выданняў ваеннай тэматыкі: энцыклапедычны слоўнік “Военное дело” Ф. А. Бракгаўза і І. А. Ефрона, у якім гэтая тэма асвятляецца з глыбокай старажытнасці да XX ст., і рэпрынтнае шматтомнае выданне “Военная энциклопедия” 1911 г., выпушчанае знакамітай пецярбургскай друкарняй “Товарищество И. Д. Сытина”, сучасныя ваенныя энцыклапедычныя і тлумачальныя слоўнікі, а таксама навукова-папулярнае выданне “История войн” пра развіццё ваеннага майстэрства ад антычнасці да ХХІ ст.
У экспазіцыі таксама прадстаўлены выданні, падрыхтаваныя Міністэрствам абароны Рэспублікі Беларусь: кніга “Вооруженные Силы Республики Беларусь: 90 лет на страже Отечества”; электроннае выданне “Вооруженные Силы Республики Беларусь: новейшая история белорусской армии” на 12-ці дысках; паэтычны зборнік “Мы храним тебя, Беларусь!”; часопіс “Армия” і яго літаратурна-мастацки дадатак “Армия и культура”.
Гэтыя і многія іншыя выданні дадуць чытачам максімальна дакладную інфармацыю пра гісторыю і сучасныя пераўтварэнні беларускай арміі, будуць спрыяць ваенна-патрыятычнаму выхаванню моладзі, паслужаць умацаванню незалежнасці, магутнасці і росквіту нашай Радзімы.
Кантактны тэлефон: 293-28-86.
Увага! У чытальных залах арганізаваны доступ да поўных спісаў літаратуры, прадстаўленай на выстаўках, якія ладзяцца ў бібліятэцы.