10 лістапада ў рамках серыі мерапрыемстваў віртуальнай чытальнай залы Нацыянальнай бібліятэкі прайшла прэзентацыя новых спецыялізаваных сістэм RemoteXs і MyLoft.
Забеспячэнне якаснага аддаленага доступу чытачоў да электронных рэсурсаў арганізацыі – як падпісных, так і ўласнай генерацыі – адна з актуальных задач для сучасных бібліятэк.
RemoteXs і MyLoft – сістэмы аўтэнтыфікацыі аддаленых карыстальнікаў электронных рэсурсаў, якія забяспечваюць кругласутачны доступ да платформ па адзіным лагіне і паролі.
Увазе ўдзельнікаў семінара быў прадстаўлены агляд магчымасцей сістэм RemoteXs і MyLoft для арганізацыі эфектыўнай дзейнасці бібліятэк. Мерапрыемства адкрыў намеснік генеральнага дырэктара – дырэктар па інфармацыйных рэсурсах і абслугоўванні карыстальнікаў Віктар Пшыбытка. У якасці спікера выступіў Андрэй Сакалоў, дырэктар па развіцці ТАА “Неопоиск”. Ён распавёў пра спецыфіку дадзеных сістэм: асаблівасці адміністравання, фарміраванне шматаспектнага модуля статыстыкі, наяўнасць мабільнай праграмы, стварэнне груп і катэгорый карыстальнікаў.
Віртуальная чытальная зала працягне цыкл мерапрыемстваў па знаёмстве з электроннымі інфармацыйнымі рэсурсамі айчынных і сусветных вытворцаў.
Чакаем вас у Нацыянальнай бібліятэцы Беларусі!
Матэрыял пададзены аддзелам карпаратыўнага ўзаемадзеяння.