Дата правядзення
Час правядзення
Месца правядзення
З 1 красавіка па 28 мая ў зале прававой інфармацыі (пам. 207b) адкрыта тэматычная выстава “Законы космасу”, прысвечаная Дню авіяцыі і касманаўтыкі, а таксама 90-годдзю з дня нараджэння савецкага лётчыка-касманаўта Юрыя Гагарына.
Эра асваення касмічнай прасторы чалавекам пачалася з гераічнага палёту па калязямной арбіце грамадзяніна СССР, лётчыка-касманаўта Ю.А. Гагарына, які быў здзейснены 12 красавіка 1961 г. Пасля яго ў космас падняліся цэлыя экіпажы, і чалавек адважыўся выйсці з касмічнага карабля ў адкрыты космас. Дзейнасць дзяржаў па даследаванні і выкарыстанні касмічнай прасторы прывяла да стварэння новай галіны міжнароднага права – касмічнага права.
Міжнароднае касмічнае права вядзе свой адлік з 1967 года, калі Генеральнай асамблеяй ААН быў прыняты і адкрыты для падпісання Дагавор аб прынцыпах дзейнасці дзяржаў па даследаванні і выкарыстанні касмічнай прасторы, уключаючы Месяц і іншыя нябесныя целы.
На працягу наступнага дзесяцігоддзя падмурак гэтай галіны міжнароднага права быў практычна сфарміраваны: асноўныя прававыя інстытуты касмічнага права атрымалі замацаванне ў пяці міжнародных дагаворах ААН, якія і сёння застаюцца пуцяводнымі для дзяржаў, якія ажыццяўляюць даследаванне і выкарыстанне касмічнай прасторы. Міжнароднае касмічнае права таксама знаходзіцца ў цесным узаемадзеянні з нацыянальнымі заканадаўчымі актамі, мае рэгіянальныя асаблівасці. Касмічная дзейнасць юрыдычных і фізічных асоб рэгулюецца нацыянальным заканадаўствам.
Наша краіна прайшла шлях ад распрацовак асобных матэрыялаў і камплектуючых у савецкі перыяд да стварэння ўласных спадарожнікаў і Цэнтра кіравання палётам у гады незалежнасці. Засталося пачакаць зусім няшмат – і новая пляяда беларускіх касманаўтаў увальецца ў міжнародную каманду на арбіце Зямлі.
На выставе экспануецца больш за 70 дакументаў на рускай і беларускай мовах. Сярод прапанаваных выданняў – зборнікі гістарычных дакументаў, зборнікі артыкулаў, матэрыялы дакладаў і навуковых канферэнцый, манаграфіі, мемуары, аўтарэфераты дысертацый.
Выстава ўключае наступныя тэматычныя раздзелы:
- Касмічная дзейнасць у міжнародна-прававым кантэксце
- Міжнароднае касмічнае права як галіна міжнароднага права
- Гісторыя касманаўтыкі ў дакументах
- Беларусь: шлях у космас
- Ваенны космас: без грыфа “сакрэтна”
- Ахова навакольнага асяроддзя ў сферы ракетна-касмічнай дзейнасці
Выстава будзе цікавая гісторыкам, спецыялістам у галіне міжнароднага права, а таксама студэнтам і курсантам, магістрантам, выкладчыкам ВНУ аэракасмічнага профілю, а таксама ўсім, хто цікавіцца пытаннямі касмічнага права і практычнай касманаўтыкі.
Карысныя спасылкі
- Дэкларацыя прававых прынцыпаў, якія рэгулююць дзейнасць дзяржаў па даследаванні і выкарыстанні касмічнай прасторы (1963)
- Даклад старшыні рабочай групы па аглядзе статусу і прымянення пяці дагавораў ААН па космасе (2023)
- Канвенцыя аб міжнароднай адказнасці за шкоду, прычыненую касмічным аб’ектам (1972)
- Канвенцыя аб рэгістрацыі аб’ектаў, якія запускаюцца ў касмічную прастору (1975)
- Пагадненне аб дзейнасці дзяржаў на Месяцы і іншых нябесных целах (1979)
- Пагадненне аб выратаванні касманаўтаў, вяртанні касманаўтаў і вяртанні аб’ектаў, запушчаных у касмічную прастору (1968)
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 28.
Матэрыял пададзены аддзелам абслугоўвання афіцыйнымі дакументамі.