Дата правядзення
Час правядзення
Месца правядзення
З 5 па 25 сакавіка ў зале прававой інфармацыі (пам. 207b) адкрыта тэматычная выстава “Канстытуцыя: гартаючы старонкі гісторыі”, прысвечаная 30-годдзю Канстытуцыі Рэспублікі Беларусь.
Канстытуцыя Беларусі была прынята 15 сакавіка 1994 г. Вярхоўным Саветам Рэспублікі Беларусь і з’яўляецца пятай па ліку Канстытуцыяй Беларусі (пасля Кастрычніцкай рэвалюцыі 1917 г.) і першай у гісторыі суверэннай рэспублікі. Беларуская Канстытуцыя адносіцца да мадэлі постсацыялістычных канстытуцый. Яна ўвабрала ўсё, што было напрацавана тэорыяй і практыкай канстытуцыйнага будаўніцтва, замацавала ў канстытуцыйных нормах шэраг агульнапрызнаных прынцыпаў міжнароднага права. Практыка яе прымянення даказала жыццяздольнасць і збалансаванасць Асноўнага закона. Разам з тым палітычная і сацыяльна-эканамічная рэальнасці, патрэба ў грамадскім развіцці абумовілі неабходнасць у карэннай мадэрнізацыі Канстытуцыі Рэспублікі Беларусь. 27 лютага 2022 г. адбыўся рэспубліканскі рэферэндум па пытанні ўнясення змяненняў і дапаўненняў у Канстытуцыю Рэспублікі Беларусь. Нягледзячы на іх вялікі аб’ём і скразны характар, Канстытуцыя не выкладаецца ў новай рэдакцыі, што падкрэслівае канстытуцыйна-прававую пераемнасць у асновах канстытуцыйнага ладу.
Навацыі развіваюць агульнапрынятыя нормы, адказваюць на запыты грамадства, адлюстроўваюць палітыка-прававую і каштоўнасную карціну беларускай дзяржавы і грамадства. Канстытуцыя як прадукт дзяржавы адлюстроўвае ўзровень развіцця ўсяго грамадства, характар сфарміраваных на момант яе прыняцця ўладных адносін, увасабляе ў сабе гістарычны вопыт станаўлення беларускай дзяржаўнасці.
На выставе экспануецца больш за 70 дакументаў на рускай і беларускай мовах. Сярод прадстаўленых дакументаў – нарматыўна-прававыя акты, каментары, зборнікі артыкулаў і тэзісы, матэрыялы дакладаў і навукова-практычных канферэнцый, аналітычных аглядаў, семінараў і круглых сталоў, манаграфіі, аўтарэфераты дысертацый.
Выстава ўключае наступныя тэматычныя раздзелы:
- Каштоўнасная парадыгма Канстытуцыі Беларусі
- Гісторыя стварэння пятай Канстытуцыі Рэспублікі Беларусь: этапы, праекты, прыняцце
- Канстытуцыйная рэформа ў Рэспубліцы Беларусь: выклікі, праблемы і перспектывы
- Канстытуцыйны суд Рэспублікі Беларусь: рэалізацыя кантролю і праваабарончай функцыі
- Канстытуцыя як аснова ўдасканалення і развіцця беларускага заканадаўства
- Сутнасць Асноўнага закона ў кантэксце сацыяльных каштоўнасцей
Выстава адрасуецца заканадаўцам, навуковым работнікам, выкладчыкам, аспірантам і студэнтам юрыдычных і гістарычных факультэтаў, палітолагам, праваабаронцам, дэпутатам і ўсім, хто цікавіцца праблемамі і гісторыяй станаўлення канстытуцыйнага права і правасуддзя ў Рэспубліцы Беларусь.
З 15 сакавіка па 30 красавіка ў кальцавой галерэі 2-га паверха адкрыта тэматычная выстава “Асноўны закон дзяржавы”, прымеркаваная да 30-годдзя Канстытуцыі Рэспублікі Беларусь у межах Года якасці.
Карысныя спасылкі:
- Канстытуцыі Беларусі
- Акты Беларускай Народнай Рэспублікі
- Акты перыяду аднаўлення беларускай дзяржаўнасці
- Акты РСФСР адносна Беларусі 1917–1918 гг.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 28.
Матэрыял пададзены аддзелам абслугоўвання афіцыйнымі дакументамі.