У пошуках жывой душы

29 лютага адбылося ўрачыстае адкрыццё выставы “У пошуках жывой душы”, прымеркаванай да 215-гадовага юбілею класіка рускай літаратуры, празаіка, драматурга, публіцыста Мікалая Васільевіча Гогаля.

Наведвальнікам прапанаваны работы сучасных беларускіх мастакоў, членаў Беларускага саюза мастакоў, а таксама студэнтаў, магістрантаў і выкладчыкаў Беларускай дзяржаўнай акадэміі мастацтваў, навучэнцаў і выкладчыкаў гімназіі-каледжа імя І.В. Ахрэмчыка, навучэнцаў Нясвіжскай дзіцячай школы мастацтваў. У экспазіцыі – жывапісныя фантазіі, графічныя разважанні, лічбавыя эксперыменты, прысвечаныя творчасці і асобе пісьменніка.

Утульныя пейзажы, поўныя гумару партрэты, яркія абстракцыі, шрыфтавыя кампазіцыі, рысы характарнага вобраза, яркія асаблівасці персанажаў і сюжэтныя інтэрпрэтацыі больш за 30 аўтараў злучаюцца ў экспазіцыйнай прасторы ў сучасны партрэт Мікалая Гогаля.

Выставу дапаўняюць выданні з фондаў Нацыянальнай бібліятэкі Беларусі. У экспазіцыі – мноства багата ілюстраваных прыжыццёвых і пазнейшых выданняў найбольш вядомых твораў Гогаля – зборнік “Вечера на хуторе близ Диканьки”, паэма “Мёртвые души”, п’еса “Ревизор”, сатырычнай прозы. Прадстаўлены таксама пераклады на беларускую мову, выкананыя Кандратам Крапівой, Міхаілам Машарам, Максімам Лужаніным, і выданні пра асобу і творчасць М.В. Гогаля.

Уваход – па чытацкім білеце або білеце сацыякультурнага цэнтра.
Час работы выставы адпавядае рэжыму работы бібліятэкі.

Тэлефон для даведак: (8 017) 368 37 37.