Выстава адной кнігі да Дня праваслаўнай кнігі

З 9 сакавіка ў музеі кнігі арганізавана выстава адной кнігі, прымеркаваная да Дня праваслаўнай кнігі і 400-годдзя Куцеінскага Богаяўленскага манастыра.

Шырокай грамадскасці прадстаўлена магчымасць пабачыць экзэмпляр друкаванага кніжнага помніка, адно з найпрыгажэйшых богаслужбовых выданняў Куцеінскай друкарні – “Трыфалагіён, альбо Цветаслоў” 1647 г. Якая яна, старажытная праваслаўная кніга? Адкуль пайшло слова “трыфалагіён”?

Выданне пабачыла свет у 1647 г. у друкарні Куцеінскага Богаяўленскага манастыра, дзе выдавалася богаслужбовая, царкоўна-палемічная і асветніцкая літаратура на царкоўнаславянскай і старабеларускай мовах. Выданні вылучаліся своеасаблівым графічным афармленнем.

“Трыфалагіён” інакш называецца “Кветкавая Мінея”, “Анфалагіён”. Літаральна ў перакладзе з грэчаскай мовы – “збор кветак”. У праваслаўнай царкве гэты адменнік частка царкоўнаслужбовай “Мінеі святочнай”, якая змяшчае чынапаследаванні да найболей важных свят, выбраных з “Мінеі месячнай”. Выданне змяшчае 19 гравюр-дрэварытаў, у якіх яскрава прасочваюцца рэалістычнасць і самабытнасць. Майстры выкарысталі прыём размяшчэння ілюстрацый ў тэксце. Музей кнігі прапануе пазнаёміцца з экзэмплярам, у якім гравюры размаляваны ад рукі.

У 1623 г. панам Багданам Статкевічам быў дадзены фундуш на будаўніцтва праваслаўнага манастыра Богаяўлення пад Оршай, які ўяўляў сабой таксама кніжны асяродак. Куцеінская друкарня дзейнічала пры манастыры ў 1630–1654 гг.

Час яе работы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.

Тэлефоны для даведак: (8 017) 293 27 81, (8 017) 293 27 22.