Сучасная навука: інавацыі, тэхналогіі, прыярытэты

З 5 студзеня па 23 лютага ў зале перыядычных выданняў (пам. 106) праходзіць тэматычная выстава “Сучасная навука: інавацыі, тэхналогіі, прыярытэты”.

Інавацыя на сучасным этапе – гэта неабходная данасць для паспяховага развіцця краіны. Актыўнае выкарыстанне і ўкараненне інавацый тычыцца не толькі прадпрыемстваў і арганізацый, але і ўсёй нацыянальнай эканомікі. Інавацыйная палітыка Рэспублікі Беларусь досыць маладая ў сваім развіцці. Яна ўлічвае не толькі асаблівасці развіцця і станаўлення беларускай дзяржавы, але і агульнасусветныя тэндэнцыі.

У Беларусі паспяхова функцыянуюць: Парк высокіх тэхналогій, навукова-тэхналагічныя паркі, навукова-вытворчыя і інавацыйныя цэнтры, Беларускі інавацыйны фонд і іншыя арганізацыі, якія працуюць у сферы інфармацыйнага, кансультацыйнага і іншага забеспячэння інавацыйнай дзейнасці. Высокім патэнцыялам развіцця інавацыйнай інфраструктуры валодае Нацыянальная акадэмія навук Беларусі. Розныя напрамкі работы гэтых структур адлюстраваны ў публікацыях рэспубліканскіх перыядычных выданняў “Вестник Фонда фундаментальных исследований”, “Союзное государство”, “Народная газета” і інш.

У пакеце дзяржаўна-тэхнічных праграм да 2025 года запланавана ўкараненне больш за 2 000 распрацовак. Аб інавацыях у сферы медыцыны, аграпрамысловага комплексу, будаўніцтва і іншых галін раскажуць публікацыі ў часопісах “Новости хирургии”, “Аграрная экономика”, “Наука и техника”, “Наука и инновации”, а таксама ў газетах “Навука”, “Рэспубліка” і інш.

Цікавы і замежны вопыт укаранення і выкарыстання інавацый, адлюстраваны ў артыкулах з часопісаў “Химия и жизнь”, “Наука и религия”, “Знание – сила”.

Усяго экспазіцыя налічвае больш за 30 перыядычных выданняў.

Тэлефон для даведак: (8 017) 293 25 87.