Дата правядзення
Час правядзення
Месца правядзення
13 кастрычніка а 16-й гадзіне ў галерэі “Атрыум” (3-ці паверх) адбылося адкрыццё выстаўкі “Карункавая гісторыя”.
Выстаўка прадстаўляе работы, выкананыя творчым тандэмам Генадзя і Святланы Вяль. Мастакі скончылі мастацка-графічны факультэт Віцебскага педагагічнага інстытута і ўжо больш за 40 гадоў ідуць поруч і ў прафесіі, і ў творчасці, і па жыцці. Майстра эстампа, малых формаў графікі Генадзя і майстрыху ручнога мастацкага ткацтва і выцінанкі Святлану аб’ядноўвае і тое, што абое прысвяцілі жыццё навучанню юных берасцейцаў асновам выяўленчага мастацтва.
У экспазіцыі Генадзь і Святлана Вяль прадстаўляюць экслібрысы і графіку, выцінанкі і габелены. Кожны твор – асобная старонка агульнай карункавай гісторыі брэсцкіх мастакоў. Мастацтва як экслібрыса, так і выцінанкі імкнецца захоўваць старажытныя традыцыі, спалучаць іх з сучаснымі аўтарскімі вынаходкамі.
Генадзь Вяль працуе ў розных тэхніках – афорт, акватынта, сухая ігла, акварэль. Выразная, адметная манера робіць прадстаўленыя на выстаўцы сюжэтныя экслібрысы пазнавальнымі. Больш за трыццаць гадоў гравюры Генадзя Вяля прадстаўляюць мастацтва беларускага эстампа на рэспубліканскіх і міжнародных графічных выстаўках і конкурсах.
Кола творчых інтарэсаў Святланы Вяль ахоплівае ручное мастацкае ткацтва і мастацтва выразання з паперы. Святлана – часты ўдзельнік выставачных праектаў, на якіх экспануецца беларуская народная творчасць. Прадстаўленыя ў экспазіцыі сатканыя сюжэты, папяровы сусвет выцінанкі ўражваюць чароўным спляценнем фантазій, глыбокай сімвалічнасцю. Кветкі, птушкі, анёлы поўняцца лірычным настроем, цеплынёй, яскравасцю фарбаў і акцэнтаў.
“Карункавая гісторыя” – пастаронкавы аповед аб шчырым захапленні культурай і літаратурай, аб аматарах кнігачытання, кніжных знакаў і ўладальніках бібліятэк, аб нацыянальных беларускіх вобразах, традыцыях і традыцыйных рамёствах, дружбе, каханні, веры і надзеі.
Выстаўка будзе працаваць да 20 лістапада 2022 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон: (8 017) 368 37 37.