Дата правядзення
Час правядзення
Месца правядзення
С 14 ліпеня ў галерэі “Атрыум” (3-ці паверх) адкрылася выстаўка сучаснага беларускага мастака Андрэя Карпянкова “Прастора колераў”.
На выстаўцы прадстаўлены серыі абстракцый, створаных аўтарам на працягу апошніх пяці гадоў: жывапісныя вобразы кветак, квітнеючыя сады, падобныя на каляровыя выбухі дрэвы, насычаныя фарбамі ўсплёскі эмоцый і ўнутраных перажыванняў. Мірыяды рознакаляровых кропляў ствараюць эфект сатканых з паветра і колераў кветкавых сюжэтаў, рассыпаных на палотнах мастака выяў і кампазіцый. Абраная аўтарам жывапісная тэхніка “дрыпінг”, калі мастак капае, пырскае або вылівае фарбу на палатно.
У сваіх творах Андрэй Карпянкоў дэманструе пачуцці і для гэтага звяртаецца да мовы экспрэсіянізму – пошуку формы і жывапіснай тэхнікі, невыпадковых плям, фактур і ліній. Яны дапамагаюць дастаткова абстрактнай мовай напісаць своеасаблівы эмацыйны дзённік.
Дамінуючы вобраз у экспазіцыі – кветкі, якія сімвалізуюць хараство прыроды, эмоцыі чалавека, імкненне падзяліцца радасцю і цеплынёй. Аднак у работах мастака феерверкі квецені сканцэнтравалі ў сабе не ціхае жыццё аб’ектаў нацюрморта, а пачуццёвую энергетыку чалавека. Экспазіцыя пабудавана такім чынам, што палотны вядуць паміж сабой своеасаблівы каларыстычны дыялог, аб’яднаны агульнай “тэмпературай колеру”, але адрозніваюцца ў характарыстыках нюансаў.
У межах выстаўкі адбудзецца прэм’ера некалькіх работ, якія былі напісаны адмыслова для экспазіцыі і раскрываюць прачытанне мастаком канцэпцыі “прастора колеру”.
Андрэй Карпянкоў – мастак, удзельнік міжнародных мастацкіх пленэраў, выставачных праектаў, выкладчык Мінскага дзяржаўнага мастацкага каледжа імя А.К. Глебава, сябра Беларускага саюза мастакоў.
Выстаўка будзе працаваць да 5 верасня 2022 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
На мерапрыемства ўваход вольны. У другі час – па чытацкім білеце або білеце сацыякультурнага цэнтра.
Тэлефоны для даведак: (8 017) 368 37 37 (для наведвальнікаў), (8 017) 293 28 21 (для СМІ).
Глядзіце таксама рэпартаж аб адкрыцці выстаўкі тэлеканала "Беларусь 1".