Індустрыя 4.0: лічбавая трансфармацыя

З 4 студзеня па 23 лютага ў зале перыядычных выданняў (пам. 106) праходзіць тэматычная выстава “Індустрыя 4.0: лічбавая трансфармацыя”.

У сучасным свеце ўсё больш хуткімі тэмпамі ідуць працэсы трансфармацыі, якія тычацца розных сфер жыццядзейнасці грамадства. Сёння маецца велізарны тэхналагічны патэнцыял, які ўсё больш інтэнсіўна рэалізоўваецца для павышэння якасці жыцця чалавека.

Пабудова “разумных гарадоў”, заснаваных на ўкараненні перадавых ІТ-рашэнняў у жыццё мегаполіса, з’яўляецца адным з прыярытэтных напрамкаў. Сучасным гарадскім тэхналогіям прысвечаны артыкулы з часопісаў “ЖКХ”, “Наука и инновации”, “Директор” і інш.

Усе сферы жыццядзейнасці – ад прамысловасці, сельскай гаспадаркі, дзяржаўнага кіравання да бізнесу і медыцыны – сёння немагчыма ўявіць без інтэрнэту і камп’ютарных тэхналогій. Пытанням лічбавізацыі ў галіне аховы здароўя, транспарту, у аграрным сектары, адукацыі і г.д. прысвечаны публікацыі ў часопісах “Адукацыя і выхаванне”, “Аграрная экономика”, “Экономика Беларуси” і інш.

У нашай рэспубліцы рэалізоўвалася Дзяржаўная праграма развіцця лічбавай эканомікі і інфармацыйнага грамадства на 2016–2020 гг., а таксама працягвае ажыццяўляцца Дзяржаўная праграма “Лічбавае развіццё Беларусі” на 2021–2025 гг. Аб выніках гэтай дзейнасці раскажуць перыядычныя выданні “Беларуская думка”, “Веснік сувязі”, “Союзное государство” і інш.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 25 87.