Дата правядзення
Час правядзення
Месца правядзення
З 5 ліпеня па 25 жніўня ў зале перыядычных выданняў (пам. 106) праходзіць тэматычная выстаўка “У выніку звычкі: грані залежнасцей”.
Рэалізацыя магчымасцей, закладзеных у чалавеку, залежыць не толькі ад яго ладу жыцця, штодзённых паводзін, умення разумна распараджацца магчымасцямі здароўя, але таксама і ад звычак. Аднак многія звычкі, якія чалавек набывае яшчэ ў школьныя гады і ад якіх потым не можа пазбавіцца ўсё жыццё, сур’ёзна шкодзяць яго здароўю. Да такіх у першую чаргу адносяцца курэнне, ужыванне алкаголю і наркотыкаў. Прадстаўленыя на выставе публікацыі з часопісаў “Беларуская думка”, “Здравоохранение”, “Минская школа сегодня”, газеты “Медицинский вестник” і іншых раскажуць пра згубны ўплыў такіх залежнасцей на здароўе чалавека.
Несумненна, курэнне, злоўжыванне алкаголем, наркаманія – гэта шкодныя звычкі, якія прыносяць масу непрыемнасцей і складанасцей. Аднак існуюць і іншыя, не менш небяспечныя і распаўсюджаныя звычкі, якія негатыўна ўплываюць на дзейнасць арганізма. Артыкулы з часопісаў “Здоровье”, “Женское здоровье”, “Женский журнал” закранаюць праблемы харчовай залежнасці.
Часам мы нават не падазраём, што нашы прыхільнасці і звычайныя ўчынкі – шлях да самаразбурэння. Пракрастынацыя, прыгнечанасць, страх перамен становяцца крыніцай непатрэбных перажыванняў. З распаўсюджанымі шкоднымі звычкамі ў псіхалагічным аспекце чытачоў пазнаёмяць публікацыі ў перыядычных выданнях “Планета”, “Психология и я”, “Диалог”.
Сучасныя камп’ютарныя тэхналогіі з іх бязмежнымі камунікатыўнымі, інфармацыйнымі, забаўляльнымі магчымасцямі з аднаго боку з’яўляюцца магутным сродкам інтэлектуальнага развіцця чалавека, з другога – сродкам разбурэння асобы, які падмяняе свет рэальных адносін і дзеянняў камп’ютарнымі мадэлямі, што блакіруе самастойнасць і свабоду выбару, фарміруе залежнасць ад гульні. Праблемы камп’ютарнай і інтэрнэт-залежнасці шырока асвятляюць часопісы “Здоровый образ жизни”, “Вопросы психологии”, “Psychologies” і інш.
Усяго на выставе прадстаўлена каля 40 перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 87.
Матэрыял пададзены аддзелам абслугоўвання спецыялізаванымі фондамі.