Якой была сядзіба графаў Храптовічаў – глядзіце на выстаўцы “Вяртанне”

У Нацыянальнай бібліятэцы Беларусі адкрыецца выставачны праект “Вяртанне”, прысвечаны спадчыне графаў Храптовічаў – сядзібе ў Шчорсах.

Радавы маёнтак знакамітага роду – гэта часткова захаваны помнік сядзібна-паркавай архітэктуры XVIII стагоддзя. Месца з багатай гісторыяй, сапраўдны гонар беларусаў. У 1770-х гадах па загадзе Іаахіма Храптовіча над палацавым комплексам з вялікім паркам і сажалкамі працавалі Джузэпэ дэ Сака, Карла Спампані і Якуб Габрыэль. У XIX стагоддзі маёнтак Храптовічаў быў важным культурным цэнтрам з вядомай калекцыяй прадметаў мастацтва і знакамітай бібліятэкай. Сюды прыязджалі Адам Міцкевіч, Уладзіслаў Сыракомля, а бібліятэкарам некаторы час працаваў Ян Чачот.

Да нашых дзён захаваліся некалькі пабудоў і рэшткі парку. Сядзіба ўключана ў Дзяржаўны спіс гісторыка-культурных каштоўнасцей Рэспублікі Беларусь.

У экспазіцыі выставачнага праекта “Вяртанне” будуць прадстаўлены жывапісныя работы, эцюды, акварэльныя замалёўкі – вынікі трох пленэраў, якія прайшлі ў сядзібе "Шчорсы". Мастакі імкнуліся ўзнавіць аблічча комплексу, яго ваколіц і пабудоў у такім выглядзе, быццам бы іх не закрануў час.

Мэта выставачнага праекта “Вяртанне” – падтрымаць рэканструкцыю комплексу як знешне, так і па змесце. Аднавіць і напоўніць былую бібліятэку і калекцыі Храптовічаў, узнавіць маёнтак, парк – хаця б на перыяд экспазіцыі, вобразна і ва ўяўленні.

Адкрыццё экспазіцыі адбудзецца 23 студзеня а 17-й гадзіне ў галерэі “Лабірынт” (3-ці паверх).
Уваход на мерапрыемства вольны, у іншы час – па чытацкім білеце або білеце сацыякультурнага цэнтра.

Выстаўка будзе доўжыцца да 19 лютага 2020 г.
Дата завяршэння яе работы можа быць зменена.

Тэлефоны для даведак: (8 017) 293 28 33, 293 28 81.
E-mail: pr@nlb.by

Чытайце таксама, як прайшло адкрыццё выставачнага праекта “Вяртанне”.