У бібліятэцы прайшло адкрыццё выставачнага праекта “Вяртанне”, прысвечанага спадчыне роду Храптовічаў у Шчорсах. Гасцей мерапрыемства чакалі жывапісныя работы, эцюды, акварэльныя замалёўкі – вынікі трох пленэраў, якія прайшлі ў сядзібе “Шчорсы”.
Распачалося адкрыццё выставачнага праекта з прывітальнага слова першага намесніка генеральнага дырэктара Нацыянальнай бібліятэкі Беларусі Алены Далгаполавай.
У мерапрыемстве прынялі ўдзел беларускі краязнаўца і калекцыянер Дзмітрый Шаўня, мастак-жывапісец, партрэтыст, член Беларускага саюза мастакоў, прафесар Аляксандр Ксяндзоў, навуковы супрацоўнік Цэнтра даследаванняў беларускай культуры, мовы і літаратуры Нацыянальнай акадэміі навук Беларусі, кандыдат мастацтвазнаўства, куратар трэцяга пленэру “Арт-сядзіба” Галіна Флікоп-Світа.
Асаблівая атмасфера гістарычнага месца дапамагла мастакам на пленэры адправіць свае думкі ў далёкае мінулае, каб потым адлюстраваць яго ў сваіх работах. Карціны вяртаюць гледачоў у часы росквіту сядзібы і перадаюць тагачасныя пейзажы, архітэктуру, жыццёвы ўклад жыхароў Шчорсаў. Таксама на выстаўцы прадстаўлены рэпрадукцыі карцін, якія ўваходзілі ў калекцыю прадметаў мастацтва графаў Храптовічаў і экспанаты з сучаснага фонду сядзібы “Шчорсы”.
Экспазіцыя “Вяртанне” ў галерэі “Лабірынт” затрымаецца да канца зімы – арганізатары плануюць завяршыць яе працу 19 лютага 2020 г., але дата заканчэння можа быць зменена.
Час працы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра.
Тэлефоны для даведак: (8 017) 293 28 33, 293 28 81.
Матэрыял прадастаўлены аддзелам сувязей з грамадскасцю.