Дата правядзення
Час правядзення
Месца правядзення
З 25 красавіка па 16 чэрвеня ў зале беларускай літаратуры (пам. 205) праходзіць кніжная выстаўка “Пісьменнік і чалавек шчодрага сэрца”, прысвечаная 120-годдзю з дня нараджэння І.Д. Гурскага.
Беларускі пісьменнік, драматург, заслужаны дзеяч культуры Беларусі Ілья Данілавіч Гурскі (1899–1972) нарадзіўся ў в. Замосце Уздзенскага раёна Мінскай вобласці. Скончыў Беларускі дзяржаўны ўніверсітэт. Удзельнік Грамадзянскай вайны. У 1935–1941 гг. рэдагаваў газету “Літаратура і мастацтва”, у Вялікую Айчынную вайну быў адказным сакратаром франтавой газеты “За Савецкую Беларусь”, рэдактарам газеты “За свабодную Беларусь”, сатырычнага лістка “Партызанская дубінка”. Пасля вайны ў 1944–1960 гг. узначальваў часопіс “Беларусь”.
Выстаўка знаёміць карыстальнікаў з літаратурнай спадчынай Ільі Гурскага: раманамі “Вецер веку”, “У агні”, “Чужы хлеб”, аповесцю “Лясныя салдаты”, кнігамі апавяданняў “На берагах Нявы”, “Над Нёманам”, “У Вялікай дарозе”, п’есамі “Качагары”, “Патрыёты”, “Хлеб”, “Дрыгва” і інш. У творах І. Гурскага паказаны працэсы і падзеі, якія адбываліся ў беларускай вёсцы ў 20-ыя гады мінулага стагоддзя, партызанская барацьба ў гады Вялікай Айчыннай вайны, жыццё ў пасляваенны час.
Экспазіцыя адлюстроўвае кніжныя выданні, публікацыі твораў пісьменніка ў часопісах “Новым шляхам”, “Маладняк” 20–30-х гг., блок матэрыялаў з водгукамі, рэцэнзіямі і ўспамінамі пра І.Д. Гурскага. Асаблівую цікавасць уяўляе зборнік “Успаміны пра Ілью Гурскага”, праілюстраваныя рэдкімі фатаграфіямі, а таксама аўтабіяграфія Ільі Данілавіча, якая ўвайшла ў кнігу аўтабіяграфій беларускіх пісьменнікаў “Пяцьдзесят чатыры дарогі”.
Час работы выстаўкі адпавядае рэжыму работы бібліятэкі.
Уваход на выстаўку – па чытацкім білеце ці білеце сацыякультурнага цэнтра бібліятэкі.
Тэлефон для даведак: (8 017) 293 27 16.
Матэрыял прадастаўлены аддзелам абслугоўвання спецыялізаванымі фондамі.