Дата правядзення
Час правядзення
Месца правядзення
З 14 сакавіка па 8 мая ў зале нотных і аўдыёвізуальных дакументаў (пам. 305) праходзіць выстаўка “Слова і пазаслоўнае”, прысвечаная 180-годдзю з дня нараджэння М.П. Мусаргскага.
Вядомы рускі кампазітар Мадэст Пятровіч Мусаргскі (1839–1881) лічыў сучасную яму музыку малодшай сястрой літаратуры і пластычных мастацтваў. Для кампазітара паэзія была раўнапраўная музыцы, але мастацкі змест паэтычнага слова ў яго музычных творах нельга вызначыць дакладна, кампазітар знаходзіцца над словам і па-за ім. Творчасць працята сувязямі гэтай паралелі: тэкст – музыка.
Сучаснікі М. Мусаргскага лічылі яго творчасць наватарскай. Аднак сам аўтар казаў, што яго музыка не выходзіць за свае межы, яна толькі пашырае ўласную тэрыторыю. Кампазітар перасягнуў стылявыя межы свайго часу і нібы ўклініўся ў музычнае XX стагоддзе, шмат у чым “прадказаўшы” яго рысы і тэндэнцыі развіцця.
Выстаўка налічвае больш за 80 дакументаў. Асноўную яе частку складаюць нотныя выданні твораў аўтара, сярод якіх вакальныя цыклы “Песни и пляски смерти”, “Детская”, “Юные годы”, цыкл п'ес для фартэпіяна “Картинки с выставки”, рамансы і песні на вершы А. Пушкіна, М. Лермантава, В. Курачкіна, М. Някрасава, А. Кальцова і інш.
З кніг С. Шліфштэйна “Мусоргский. Художник. Время. Судьба”, Г. Хубава “Мусоргский”, Э. Фрыд “М.П. Мусоргский. Проблемы творчества”, Н. Новікава “Молитва Мусоргского”, А. Васільевай “Неизвестные страницы жизни Мусоргского”, а таксама публікацый у перыядычных выданнях можна даведацца пра жыццё і творчасць кампазітара.
Дапаўняюць экспазіцыю аўдыёзапісы вядомых твораў М. Мусаргскага – опер “Хаваншчына”, “Барыс Гадуноў”, “Сарочынскі кірмаш”, сцэн з оперы “Жаніцьба”, песень, рамансаў і інш.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял прадастаўлены аддзелам абслугоўвання спецыялізаванымі фондамі.
