Дата правядзення
Час правядзення
Месца правядзення
З 1 сакавіка па 16 мая ў зале беларускай літаратуры (пам. 205) праходзіць юбілейная кніжная выстаўка “І сэрцам песню праспяваць…”, прысвечаная 90-годдзю з дня нараджэння беларускай паэтэсы Еўдакіі Якаўлеўны Лось.
Мужна, адкрыта і шчыра ўвайшла пісьменніца ў гісторыю беларускай літаратуры ХХ стагоддзя. Яна была паэткай, якая тонка адчувала прыгажосць і мілагучнасць роднага слова, разнастайныя перажыванні чалавечага сэрца.
Еўдакія Якаўлеўна (1929–1977) з пакалення тых, чыё дзяцінства адабрала вайна і хто мужнеў у цяжкія пасляваенныя гады. Шмат вершаў было ёй напісана менавіта пра гэту старонку жыцця. Але ёсць і іншыя тэмы, якія яна раскрывае з не меншай паўнатою – чаканне шчасця, радасць мацярынства, прага кахаць і быць каханай. Пісаць, як дыхаць – было яе правілам, і таму паэтэса адстойвала права выказваць інтымнае, набалелае.
Выстаўка налічвае больш за 100 дакументаў і складаецца з трох раздзелаў.
Шматлікая літаратурная спадчына Е.Я. Лось прадстаўлена ў першым раздзеле экспазіцыі. Гэта кнігі паэзіі “Сакавік”, “Палачанка”, “Яснавокія мальвы”, “Галінка з яблыкам”, “Лірыка ліпеня”, зборнікі апавяданняў і лірычных замалёвак “Пацеркі” і “Травіца брат-сястрыца”, дзіцячыя кніжкі “Абутая ёлачка”, “Казка пра Ласку”, “Зайчык-выхваляйчык”, а таксама выбраныя творы і дзённікі пісьменніцы, публікацыі вершаў у часопісах і інш.
З творамі Еўдакіі Лось на розных мовах свету, а таксама з прыкладамі перакладчыцкай дзейнасці самой паэтэсы знаёміць другі раздзел экспазіцыі.
Дапаўняюць выстаўку біяграфічныя і літаратурна-крытычныя публікацыі пра Еўдакію Якаўлеўну.
Час работы выстаўкі адпавядае рэжыму работы бібліятэкі.
Уваход на выстаўку – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял прадастаўлены аддзелам абслугоўвання спецыялізаванымі фондамі.