Варвара Міронаўна нарадзілася ў 1921 годзе ў вёсцы Новы Ропск Клімаўскага раёна Бранскай вобласці ў сялянскай сям’і.
Адразу пасля сярэдняй школы Варвара скончыла Навазыбкаўскі рабфак (цяпер – Навазыбкаўскі філіял Бранскага дзяржаўнага педагагічнага ўніверсітэта імя акадэміка І.Г. Пятроўскага). Кваліфікацыю бібліёграфа дзяўчына атрымала ўжо ў 20-гадовым узросце, скончыўшы Маскоўскі дзяржаўны бібліятэчны інстытут імя В.М. Молатава (цяпер – Маскоўскі дзяржаўны інстытут культуры). Пасля заканчэння вучобы была накіравана на працу ў Хабараўскую абласную бібліятэку на пасаду загадчыцы абанемента.
Аднак працоўны шлях Варвары Міронаўны ў гэтым статусе скончыўся ледзь пачаўшыся, паколькі неўзабаве фашысцкая Германія развязала ваенныя дзеянні супраць СССР і дзяўчына ўключылася ў агульнанародную барацьбу з акупантамі. З 1942 па 1945 год яна мужна змагалася ў шэрагах Савецкай арміі, выконваючы абавязкі радыёаператара. За добрасумленную службу ёй была ўручана Ганаровая грамата Ваеннага савета войскаў супрацьпаветранай абароны за свядомую службу ў дні Вялікай Айчыннай вайны.
Пасля дэмабілізацыі В.М. Сіленка вярнулася ў бібліятэчную сферу і на працягу наступных пяці гадоў працавала ў Бранскай абласной навуковай бібліятэцы (цяпер – Бранская абласная навуковая ўніверсальная бібліятэка імя Ф.І. Цютчава), у бібліятэцы Кокінскага сельскагаспадарчага тэхнікума (цяпер – Бранскі дзяржаўны аграрны ўніверсітэт), ва Уладзімірскай абласной бібліятэцы (цяпер – Уладзімірская абласная ўніверсальная навуковая бібліятэка імя М. Горкага).
У 1950 годзе Варвара Міронаўна выйшла замуж і па сямейных абставінах у жніўні 1952 года пераехала на пастаяннае месца жыхарства ў Мінск.
Сваю працоўную дзейнасць у Дзяржаўнай бібліятэцы БССР імя У.І. Леніна (цяпер – Нацыянальная бібліятэка Беларусі) В.М. Сіленка пачала ў жніўні 1952 года. Яна прайшла тут прафесійны шлях ад бібліёграфа да загадчыцы навукова-бібліяграфічнага аддзела.
В.М. Сіленка займалася анатаваннем беларускай, грамадска-палітычнай, прыродазнаўчай і медыцынскай літаратуры; вяла прадметны каталог; удзельнічала ў складанні рэкамендацыйных спісаў літаратуры; аператыўна і якасна выконвала вусныя і пісьмовыя даведкі.
Зарэкамендаваўшы сябе дасведчаным, адказным, творчым і ініцыятыўным работнікам, Варвара Міронаўна ў 1971 годзе была прызначана на пасаду загадчыцы навукова-бібліяграфічнага аддзела.
В.М. Сіленка мела вялікі вопыт бібліяграфічнай працы: яна аўтар і складальнік больш за 25 апублікаваных работ – якасна падрыхтаваных рэкамендацыйных паказальнікаў і спісаў літаратуры, якія заўсёды мелі шырокі водгук у бібліятэчных спецыялістаў. Сярод іх: рэкамендацыйныя паказальнікі літаратуры “Мінску – 900 год”, “Па прасторах Беларусі”; метадычныя рэкамендацыі для масавых бібліятэк “Рекомендательная библиография в руководстве чтением рабочей молодежи”, “Рекомендательная библиография в помощь профессиональному чтению тружеников села”; кансультацыі па выкарыстанні ў рабоце бібліятэк інфармацыйна-бібліяграфічнага часопіса “Новые книги” і бібліяграфічнага бюлетэня “Новыя кнігі БССР”.
Варвара Міронаўна была старшынёй бібліяграфічнай камісіі Рэспубліканскага міжведамаснага бібліятэчнага савета, праводзіла дбайную працу па вывучэнні і выкарыстанні рэкамендацыйнай бібліяграфіі ў бібліятэках рэспублікі.
Дасягнуўшы пенсійнага ўзросту, у студзені 1977 года Варвара Міронаўна сышла на заслужаны адпачынак, прысвяціўшы трыццаць шэсць гадоў бібліятэчнай справе, дваццаць пяць з якіх – працы ў Дзяржаўнай бібліятэцы БССР імя У.І. Леніна.
Уклад Варвары Міронаўны Сіленка ў развіццё бібліятэчнай справы краіны, яе дзейнасць па захаванні культурнай і гістарычнай спадчыны атрымалі высокую ацэнку дзяржавы. Сведчанне таму – уручаныя ёй ўзнагароды: медаль “За доблесную працу. У азнаменаванне 100-годдзя з дня нараджэння У.І. Леніна”; Грамата Вярхоўнага Савета БССР за актыўную працу ў галіне бібліяграфіі; значок Міністэрства культуры СССР “За выдатную працу”; Ганаровая грамата Міністэрства культуры БССР і Беларускага рэспубліканскага камітэта прафсаюза работнікаў культуры (уручана тройчы: у 1962, 1971, 1977 гг.).
Загадам па Дзяржаўнай бібліятэцы БССР імя У.І. Леніна за высокія паказчыкі па выкананні вытворчых планаў, высокую культуру абслугоўвання чытачоў, вялікую працу па развіцці бібліятэчнай справы ў рэспубліцы, шматгадовую і актыўную працу ў бібліятэцы імя Варвары Міронаўны Сіленка было занесена ў Кнігу народнай славы Нацыянальнай бібліятэкі Беларусі.
На жаль, з цягам часу сувязь з Варварай Міронаўнай была страчана і далейшы яе лёс нам невядомы. Мы працягваем пошукавую працу і будзем удзячны за дапамогу ўсім, хто ведаў яе і валодае якой-небудзь інфармацыяй.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.