Конкурс юных чытальнікаў “Жывая класіка” як магчымасць далучыцца да добрай літаратуры, прапушчанай праз дзіцячыя сэрцы.
Школьнікі з усёй краіны спаборнічаюць у майстэрстве чытання выдатных твораў беларускіх аўтараў. Сёлета конкурс праходзіць ужо пяты раз. Але толькі ў гэтым годзе ён набыў новыя маштабы – зрабіўся рэспубліканскім – у ім удзельнічаюць прадстаўнікі амаль усіх раёнаў краіны. Ужо падведзены вынікі абласных і мінскага гарадскога этапаў. Пераможцы сустрэнуцца ў фінале, які пройдзе 1 і 2 верасня ў Полацку падчас Дня беларускага пісьменства.
Сёлета ўдзел у конкурсе прынялі 13 394 школьнікі з усёй краіны. 606 вучняў спаборнічалі ў абласных адборах. У Полацку ж сваё майстэрства прадэманструюць 28 юных чытальнікаў. Яны ўжо атрымалі свой шчаслівы білет – магчымасць наведаць святочныя мерапрыемствы на радзіме першадрукара, паўдзельнічаць ва ўрачыстых школьных лінейках, першых званках у слаўным Полацку. Больш за тое, пераможца прачытае выбраны твор на канцэрце закрыцця свята пісьменства 3 верасня.
Традыцыйна на “Жывую класіку” запрашаюць і пісьменнікаў з іншых краін, якія прыязджаюць на свята, каб на сабе адчуць унікальную атмасферу беларускага слова.
– Дзень беларускага пісьменства – свята з міжнародным розгаласам, – адзначае намеснік міністра інфармацыі Беларусі Аляксандр Карлюкевіч. – Сапраўды, пісьменнікі, паэты з іншых краін удзельнічаюць і ў фінальным этапе конкурсу “Жывая класіка”, выступаюць у перапынках паміж чытаннямі вершаў дзецьмі. Сёлета чакаем прадстаўнікоў больш чым з дзесяці краін свету: пройдзе традыцыйны міжнародны круглы стол з удзелам замежных і беларускіх пісьменнікаў. Ужо пацвердзілі свой удзел госці з Казахстана, Таджыкістана, Туркменістана, Літвы, Польшчы, розных рэгіёнаў Расіі. Спадзяёмся, што прыедзе вядомы Мар’ян Серватка, былы пасол Славацкай рэспублікі ў Беларусі. Дарэчы, хачу адзначыць, што цяпер у Славакіі, у юбілейны для Янкі Купалы год, выйшла кніга вершаў “А хто там ідзе?”, прычым у новых перакладах славацкіх паэтаў. Думаю, што будуць госці з Азербайджана, Арменіі. Усе яны (калі казаць пра ўражанні мінулых гадоў) з захапленнем успрымаюць тую атмасферу “Жывой класікі”, якая спалучаецца з удзелам школьнікаў у свяце беларускага пісьменства. Многія гавораць, што гэта эксклюзіўны праект Беларусі.
Адзін з адметных юных чытальнікаў – Багдан Цэхановіч, які скончыў трэці клас школы № 2 Мар’інай Горкі, – спецыяльна завітаў у Мінск на сустрэчу з журналістамі, каб прадэманстраваць сваё чытанне ўрыўка паэмы “Новая зямля” Якуба Коласа – і гэта невыпадкова. Першы намеснік старшыні Саюза пісьменнікаў Беларусі Алена Стэльмах адзначае:
– Самым папулярным пісьменнікам, якога сёлета чыталі ўдзельнікі “Жывой класікі”, аказаўся Якуб Колас. Менавіта да яго твораў найчасцей звярталіся дзеці. А самы папулярны твор (нядаўна споўнілася 110 гадоў з моманту яго напісання) – “Савось-распуснік” гэтага ж аўтара. Чые творы яшчэ чытаюць дзеці? Янкі Купалы, Максіма Багдановіча, Змітрака Бядулі, Адама Міцкевіча, Канстанцыі Буйло, таксама сучасных аўтараў Уладзіміра Ліпскага, Алеся Бадака і іншых. Вядома, вялікая ўвага ў сёлетнім конкурсе ўдзелена тэме Францыска Скарыны і 500-годдзя айчыннага кнігадрукавання, якое мы адзначаем... Думаю, у конкурсу добрая і светлая будучыня. Ёсць ідэя ў наступным годзе зрабіць яго і конкурсам аўтарскіх вершаў, бо ў дзяцінстве многія захапляюцца іх напісаннем. Нашаму Саюзу пісьменнікаў важна падтрымаць творчую моладзь, каб роднае слова жыло.
Намеснік генеральнага дырэктара тэлеканала СТБ Павел Каранеўскі адзначыў, што кожны дзень у праграме “Раніца. Студыя добрага настрою” можна ўбачыць і пачуць кагосьці з юных чытальнікаў. Таксама ён падкрэсліў, што для конкурсу ў Полацку, па магчымасці, для кожнага ўдзельніка ствараецца адметны сцэнічны вобраз. Гэта варта ўбачыць.
Аўтар публікацыі: Ніна Шчарбачэвіч.
Крыніца: Звязда
Чытайце таксама:
