На сайце Магілёўскай абласной бібліятэкі імя У.І. Леніна створана віртуальная выстаўка “Янка Купала і Якуб Колас у творчасці пісьменнікаў Магілёўшчыны”.
130-гадовы юбілей нацыянальных паэтаў Беларусі Янкі Купалы і Якуба Коласа шырока адзначаецца ў нашай краіне і за яе межамі. Літаратурна-мастацкая спадчына беларускіх песняроў – вялікае нацыянальнае багацце. Творы паэтаў трывала ўвайшлі ў наша паўсядзённае жыццё, сталі неад’емнай часткай духоўнай культуры народа. Дзякуючы свайму таленту Янка Купала і Якуб Колас здолелі на поўны голас сказаць сваім сучаснікам і нашчадкам, народам іншых краін праўдзівае слова пра Беларусь, яе мінулае, нацыянальны характар беларусаў. У гэтым іх вялікая гістарычная заслуга. Сваімі глыбоказмястоўнымі творамі яны кансалідавалі беларускі народ, умацоўвалі яго адзінства, скіроўвалі яго духоўныя сілы, яго энергію і энтузіязм на вырашэнне агульнадзяржаўных задач, на развіццё нацыянальнай культуры.
Сёння творы Купалы і Коласа, як і ў папярэднія дзесяцігоддзі, карыстаюцца шырокай папулярнасцю. Яны прывабліваюць чытача глыбінёй думкі, праўдзівым адлюстраваннем жыцця, шчырасцю выяўлення пачуццяў любові да чалавека, роднага кута, сваёй Радзімы.
На геаграфічнай карце рэспублікі мноства мясцін, якія сведчаць аб размаху і інтэнсіўнасці творчых і жыццёвых сувязей песняроў са сваім народам. Ёсць такія мясціны і на Магілёўшчыне.
Аб наведванні паэтамі гарадоў і вёсак краю было апублікавана мноства асобных артыкулаў. Янка Купала трынаццаць разоў прыязджаў на Магілёўшчыну, толькі ў савецкі час пабываў у Бабруйску, Клімавічах, Магілёве, Горках, вёсках Горы Горацкага і Александрыя Шклоўскага раёнаў. Яшчэ больш шырокая геаграфія падарожжаў Якуба Коласа па Прыдняпроўскім краі. Зафіксавана ажно пятнаццаць яго прыездаў сюды: Бабруйск, Быхаў, Горкі, Клімавічы, Магілёў, Мсціслаў, Хоцімск, Шклоў, вёскі Забялышына і Трасціно Хоцімскага раёна, Шыркі і Горы Горацкага раёна. Купала і Колас прымалі ўдзел у літаратурных вечарынах і сустрэчах, прысутнічалі на спектаклях у Магілёўскім абласным драмтэатры, наведвалі навучальныя ўстановы. Янка Купала цікавіўся гісторыяй Магілёва. Народнае паданне пра ўзнікненне горада пакладзена ў аснову яго паэмы “Магіла льва”.
Можна з упэўненасцю сказаць, што зямля Магілёўшчыны дала для творчасці Я. Купалы і Я. Коласа спрыяльную глебу. Шмат твораў, напісаных імі ў час наведвання вобласці, увайшлі ў паэтычныя скарбонкі паэтаў.
Асобы класікаў беларускай літаратуры заўсёды былі прыцягальнымі для майстроў слова. Не абышлі іх увагай і пісьменнікі Магілёўшчыны. Амаль у кожнага паэта-магілёўца ёсць верш, а то і не адзін, прысвечаны народным песнярам. Славутыя магілёўскія купала- і коласазнаўцы Р. Бярозкін, М. Мушынскі, В. Жураўлёў і інш. стварылі надзейны навукова-тэарытычны фундамент для глыбокай і праніклівай ацэнкі творчай спадчыны класікаў.
З мэтай адлюстравання сувязі народных пісьменнікаў з літаратурным жыццём краю аддзел беларускай і краязнаўчай літаратуры стварыў віртуальную выстаўку “Янка Купала і Якуб Колас у творчасці пісьменнікаў Магілёўшчыны”, якая складаецца з трох раздзелаў: “Вершы, прысвечаныя Я. Купалу і Я. Коласу”, “Зборнікі паэзіі з вершамі пра Я. Купалу і Я. Коласа”, “Літаратуразнаўцы-магілёўцы аб творчасці Я. Коласа і Я. Купалы”.
Выстаўка адрасавана шырокаму кругу карыстальнікаў: літаратарам, настаўнікам, краязнаўцам, навучэнцам, а таксама бібліятэкарам для падрыхтоўкі масавых мерапрыемстваў, кніжных выставак.
Крыніца: Магілёўская абласная бібліятэка імя У.І. Леніна
Чытайце таксама пра віртуальныя выстаўкі бібліятэкі, прысвечаныя краязнаўству і знакамітым дзеячам гісторыі і культуры:
- Муза Серебряного века (да 120-годдзя з дня нараджэння Марыны Цвятаевай)
- У віры імклівага жыцця (да 110-годдзя з дня нараджэння Міхася Зарэцкага/Міхаіла Яфімавіча Касянкова)
- Рэаліі жыцця Максіма Танка (да 100-годдзя з дня нараджэння Максіма Танка /Яўгена Іванавіча Скурко)
- Святло паэзіі Максіма Багдановіча (да 120-годдзя з дня нараджэння Максіма Адамавіча Багдановіча)
- Многогранный ученый Отто Юльевич Шмидт (да 120-годдзя з дня нараджэння Ота Юльевіча Шміта)
- Пісьменнік. Рэдактар. Чалавек (да 60-годдзя з дня нараджэння Міхаіла Паўлавіча Пазнякова)
- Писатель огненных лет (да 95-годдзя з дня нараджэння Канстанціна Міхайлавіча Сіманава)
- Он писал историю народа (да100-годдзя з дня смерці Льва Мікалаевіча Талстога)
- Паэт слова (да 90-годдзя з дня нараджэння Аляксея Васільевіча Пысіна)
- Чехов… Величайший мастер слова (да 150-годдзя з дня нараджэння Антона Паўлавіча Чэхава)
- Биографии знаменитых людей
- «ЖЗЛ» – летопись столетий
- Ганаровыя грамадзяне горада Магілёва
- Возвращенное наследие
- Мая Радзіма Беларусь