З 20 ліпеня па 20 жніўня ў зале нотных і аўдыядакументаў (пам. 305) праходзіць юбілейная выстаўка “Льюцца гукі, пяшчотныя, мяккія, узнёслыя”, прысвечаная 70-годдзю беларускага кампазітара Р.Ф. Суруса.
Круг мастацкіх інтарэсаў заслужанага дзеяча мастацтваў Рэспублікі Беларусь (1985) Рыгора Фёдаравіча Суруса пашыраўся паступова. У пачатку творчага шляху ў цэнтры яго ўвагі была інструментальная музыка, асабліва фартэпіянная. Асноўнае месца ў фартэпіяннай музыцы заняла мініяцюра, прадстаўленая ў шматлікіх п’есах, прэлюдыях, варыяцыях. Фартэпіянныя творы кампазітара трывала ўвайшлі ў канцэртную практыку, педагагічны рэпертуар, у праграмы конкурсаў. Яны адрозніваюцца вынаходлівасцю, багаццем фактуры, тэхнічных і выканальніцкіх прыёмаў, прадуманай формай перадачы мастацкіх задум.
На выстаўцы шырока прадстаўлена фартэпіянная музыка Рыгора Фёдаравіча. Гэта прэлюдыі “Парыў ветру”, “Абуджэнне дня”, санаты № 2 і № 5, ронда-фантазія на беларускія тэмы, канцэртны вальс “Настрой”, сюіта “Сонечны дзень”. У экспазіцыі таксама размешчаны фартэпіянныя творы кампазітара для дзяцей. Гэта канцэрт для фартэпіяна з аркестрам “Юнацкі”, сюіта для фартэпіяна “Школьны дзень”, школьны альбом “Дом з фартэпіяна” (п’есы і ансамблі), сюіта “Школьная” для фартэпіяна ў пяці частках.
Творчасць Р.Ф. Суруса звяртае на сябе ўвагу шырынёй інтарэсаў да самых разнастайных музычных жанраў і формаў. Музыка тэатральных пастановак прадстаўлена на выстаўцы музычнымі камедыямі “Несцерка” (1975), “Судны час” (1983). Экспануюцца таксама аркестравыя творы майстра, камерна-інструментальныя п’есы, апрацоўкі беларускіх народных песень, педагагічны рэпертуар для віяланчэлі, баяна, драўляных духавых інструментаў, вакальна-інструментальныя творы (кантаты “Упарты Фама”, “Лірычная”, “Фарбы дзяцінства”, канцэрт “На дажынках”, сюіта “Сваток”).
Музыка Рыгора Фёдаравіча прыцягвае дэмакратычнасцю і шчырасцю выказвання, яркай маляўнічасцю. Яго творы атрымалі ўсеагульнае прызнанне, некаторыя з іх адзначаны дыпломамі розных фестываляў і конкурсаў.
Наведвальнікі могуць убачыць на выстаўцы нотныя зборнікі шматлікіх твораў кампазітара, сярод якіх рукапісныя ноты, а таксама аўдыядакументы з фондаў Нацыянальнай бібліятэкі Беларусі. Дапаўняюць экспазіцыю публікацыі з перыядычных выданняў пра жыццё і творчасць Р.Ф. Суруса, фатаграфіі з яго асабістага архіва.
Кантактны тэлефон: (+375-17) 293-27-52.