У Віцебскай абласной бібліятэцы імя У.І. Леніна арганізаваны цыкл юбілейных кніжных выставак, прысвечаных 65-годдзю Перамогі і 80-годдзю з дня нараджэння У. Караткевіча.
Аддзелам беларускай літаратуры да 80-годдзя з дня нараджэння Уладзіміра Караткевіча ладзіцца цыкл выставак “Пад чароўным ветразем стагоддзяў”.
Выстаўка “Дабро застаецца назаўжды”, якая адкрылася ў ліпені, прысвечана раману У. Караткевіча “Чорны замак Альшанскі”.
Дэтэктыўна-прыгодніцкая кніга ў беларускай літаратуры – госць нячасты. Найбольш трывалую цікавасць да гэтага жанру з глыбока жыццёвым і нацыянальным яго напаўненнем праяўляў У. Караткевіч. Ён паглыбляўся ў мінулае нашай радзімы, даследаваў далёкія эпохі, жыццё беларускага народа ў былыя часы, выкарыстоўваючы пры гэтым востры сюжэт, імклівасць дзеяння, умоўнасць і таямнічасць, уласцівыя прыгодніцкаму жанру.
Экспазіцыю цыкла “Хвалюючы летапіс Перамогі” працягвае чарговая выстаўка пад назвай “Пяты, пяты, я рамонак…”, якая адлюстроўвае матэрыялы пра станаўленне і дзейнасць беларускага патрыятычнага падполля ў гады Вялікай Айчыннай вайны.
З першых дзён вайны асноўная частка насельніцтва Беларусі стала на шлях барацьбы супраць акупантаў. На захопленай ворагам тэрыторыі Беларусі стваралася сетка падпольных цэнтраў, арганізацый і груп. Важную ролю ў станаўленні і ўмацаванні падполля адыгралі першыя падпольныя партыйныя камітэты.
Дзейнасць падпольшчыкаў прыносіла ворагу вялікія страты. Масавы характар набылі дыверсіі на чыгуначных магістралях, на прамысловых прадпрыемствах. Падпольшчыкі вялі таксама агітацыйна-прапагандысцкую і шырокую разведвальную дзейнасць у інтарэсах партызан і Чырвонай Арміі.