З 6 жніўня па 5 верасня ў аддзеле абслугоўвання афіцыйнымі дакументамі (пам. 207) ладзіцца тэматычная кніжная выстаўка “Моладзь сёння: праблемы, пошукі, рашэнні”, прысвечаная Міжнароднаму дню моладзі.

Моладзь з’яўляецца найважнейшым стратэгічным рэсурсам грамадства. Менавіта моладзь вызначае тэмпы і маштабы сацыяльнага і навукова-тэхнічнага прагрэсу, уплывае на ўзровень устойлівага і бяспечнага развіцця чалавецтва. Рашэнне любой рэгіянальнай, дзяржаўнай або глабальнай праблемы непасрэдна звязана з дзейнасцю маладых людзей, з іх маральнай і прафесійнай пазіцыяй.

Сучасную моладзь адрознівае рост самастойнасці, практычнасці і мабільнасці, адказнасці за свой лёс, рэзкае павышэнне зацікаўленасці ў атрыманні якаснай адукацыі і прафесійнай падрыхтоўкі, якія ўплываюць на далейшае працаўладкаванне і кар’еру. Маладыя людзі імкнуцца да інтэграцыі з міжнароднай маладзёжнай супольнасцю, да ўдзелу ў агульнасусветных эканамічных, палітычных і гуманітарных працэсах. У сувязі з развіццём сродкаў камунікацыі сціраецца грань паміж маладымі людзьмі розных дзяржаў. З другога боку, сёння маладым уласцівы нізкі ўзровень зацікаўленасці і ўдзелу ў падзеях палітычнага, эканамічнага і культурнага жыцця краіны. Павялічваюцца паказчыкі смяротнасці моладзі з-за ненатуральных прычын, расце крыміналізацыя моладзі, уплыў на яе дэструктыўных субкультур і супольнасцей.

Пытанні, звязаныя з моладдзю, знаходзяцца ў цэнтры ўвагі шэрага міжнародных і рэгіянальных арганізацый: Арганізацыі Аб’яднаных Нацый (ААН) і яе спецыялізаваных устаноў – Арганізацыі Аб’яднаных Нацый па пытаннях адукацыі, навукі і культуры (ЮНЕСКА), Міжнароднай арганізацыі працы (МАП), Сусветнай арганізацыі аховы здароўя (СААЗ), Сусветнага банка, Харчовай і сельскагаспадарчай арганізацыі ААН (ФАА), а таксама Еўрапейскага саюза, Савета Еўропы і інш. Дзень 12 жніўня абвешчаны Генеральнай Асамблеяй ААН Міжнародным днём моладзі.

Развіццё грамадства напрамую залежыць ад таго, наколькі эфектыўна дзяржава выкарыстоўвае творчы патэнцыял маладога пакалення, якім чынам рэалізуе меры для яго сацыялізацыі. Маладзёжная палітыка дзяржавы ўяўляе сабой сістэму палітычных, эканамічных, сацыяльных, арганізацыйных і прававых мер, накіраваных на падтрымку маладых грамадзян. Гэтыя меры ажыццяўляюцца дзяржавай для сацыяльнага станаўлення і развіцця моладзі з мэтай найбольш поўнай рэалізацыі яе патэнцыялу ў розных галінах жыццядзейнасці. Маладзёжная палітыка дзяржавы залежыць ад палітычнага рэжыму, узроўню развіцця эканомікі, культурных традыцый грамадства і г. д.

У Рэспубліцы Беларусь узроставыя рамкі моладзі вызначаны ад 16 да 30 гадоў. Дзяржаўная маладзёжная палітыка з’яўляецца прыярытэтным напрамкам сацыяльнай і эканамічнай палітыкі рэспублікі. Суб’ектамі дзяржаўнай маладзёжнай палітыкі краіны з’яўляюцца: Прэзідэнт Рэспублікі Беларусь, Нацыянальны сход Рэспублікі Беларусь, Савет Міністраў, мясцовыя Саветы дэпутатаў, выканаўчыя органы. Пытаннямі фарміравання і рэалізацыі маладзёжнай палітыкі займаецца ўпраўленне па справах моладзі Міністэрства адукацыі Рэспублікі Беларусь. Кожныя тры гады прымаецца спецыяльная праграма “Моладзь Беларусі”.

У краіне функцыянуюць маладзёжныя аб’яднанні, сярод якіх – Беларускі рэспубліканскі саюз моладзі, Беларуская рэспубліканская піянерская арганізацыя, Беларуская асацыяцыя клубаў ЮНЕСКА, Ліга добраахвотнай працы моладзі, Беларуская рэспубліканская скаўцкая асацыяцыя і інш.

Прапанаваная тэматычная выстаўка раскрывае сацыяльныя, культурныя, эканамічныя і палітычныя аспекты становішча моладзі ў сучасным грамадстве. У экспазіцыі прадстаўлена больш за 100 выданняў: публікацыі замежных і айчынных аўтараў, дакументы міжнародных арганізацый на рускай, англійскай, французскай і нямецкай мовах.

Выстаўка ўключае наступныя тэматычныя раздзелы:

Моладзь у сучасным свеце;
Міжнародныя прававыя дакументы і праграмы, якія датычацца моладзі;
Адукацыя моладзі;
Моладзь і рынак працы;
Здароўе моладзі;
Дзяржаўная маладзёжная палітыка Рэспублікі Беларусь.

Выстаўка будзе цікавая выкладчыкам, навуковым работнікам, аспірантам, студэнтам, а таксама ўсім тым, хто цікавіцца пытаннямі маладзёжнай палітыкі ў нашай краіне і ў свеце.

Карысныя спасылкі

Моладзь сёння: праблемы, пошукі, рашэнні

Інфармацыйныя рэсурсы

Паслугі