3 жніўня ў Нацыянальнай бібліятэцы Польшчы адбылося адкрыццё рэкламнай фотавыстаўкі “Нацыянальная бібліятэка Беларусі”, якая ладзіцца на працягу года ў шэрагу найбуйнейшых гарадоў Заходняй Еўропы.
Экспазіцыя складаецца з 25 работ вядомых беларускіх фотамастакоў – Анатоля Дрыбаса, Лолія Македонскага, Аляксандра Жарнасека, Віктара Суглоба, Валерыя Харчанкі і інш., – якія заключылі ўнутранае і знешняе ўбранне “Алмаза ведаў” у аб’ектыў сваіх фотакамер. Уся своеасаблівасць форм, непаўторная пластычнасць і прастата high-tech-абрысаў Нацыянальнай бібліятэкі Беларусі лаканічна прапісаны і ў радзе рэпартажных фота, якія адлюстроўваюць шматпланавае жыццё Мінска і гараджан.
У варшаўскай выстаўцы ўзялі ўдзел прадстаўнікі Міністэрства замежных спраў, Міністэрства культуры і нацыянальнай спадчыны, іншых органаў дзяржаўнага кіравання Польшчы, СМІ; дэпутаты Сейма і супрацоўнікі дыпламатычнага корпуса, акрэдытаванага ў Рэспубліцы Польшча; творчая інтэлігенцыя і грамадскасць Варшавы; актывісты таварыстваў “Польшча-Беларусь” і “Польшча-Усход”.
Экспазіцыю адкрылі намеснік дырэктара Нацыянальнай бібліятэкі Польшчы Эва Патшэбніцкая і Часовы павераны ў справах Рэспублікі Беларусь у Рэспубліцы Польшча Андрэй Лазовік.
Для наведвальнікаў фотавыстаўка будзе доўжыцца да 20 жніўня.
Тэлефон для даведак: 293-27-56, 293-27-67, 293-27-64.
E-mail: pr@nlb.by
