Пано з’явіцца на тарцы дома № 2 па вуліцы Жан-Поля Марата. Аўтар выявы – аршанскі мастак Дзмітрый Талкачоў. У эскізе выкарыстаны малюнкі Караткевіча і фрагменты яго рукапісаў.
Мурал з’явіцца з ініцыятывы мецэната Андрэя Балабіна, які раней набыў родны дом Уладзіміра Караткевіча ў Оршы і плануе ператварыць яго ў музей і цэнтр культуры.
Сцяна жылога будынка па Марата, 2 выходзіць на вуліцу Караткевіча і знаходзіцца ўсяго за пару метраў ад дома, дзе нарадзіўся класік. Насупраць – радзільня. Тарэц шматпавярхоўкі выходзіць на адкрытую прастору і размяшчаецца на пагорку. Тэматычная выява задасць атмасферу ўсёй вуліцы і зробіць прагулкі жыхароў Оршы і гасцей горада больш прыемнымі.
Мурал плануюць скончыць 23 лістапада.
Крыніца: Новы час