На працягу двух дзён Касцюковіцкая зямля дыхала музыкай, паэзіяй і песняй. Тут прайшло III Абласное свята паэзіі і аўтарскай песні “Пісьмянкоў луг”.
У першы дзень свята для гасцей была арганізавана экскурсійная праграма “Па шляхах вядомых землякоў”. Маршрут экскурсіі праходзіў праз Касцюковіцкі краязнаўчы музей, літаратурны музей А. Куляшова ў аграгарадку Новыя Саматэвічы і Студзянецкую святую крыніцу.
Апошнім прыпынкам першага святочнага дня стаў гісторыка-культурны аб’ект “Пісьмянкоў луг” на беразе ракі Бесядзь у вёсцы Бялынкавічы, дзе адбыліся Пісьмянкоўскія чытанні. У мерапрыемстве ўзялі ўдзел ганаровыя госці свята: пісьменнікі-землякі, сваякі вядомых беларускіх творцаў, сталічныя літаратары, а таксама госці з Бранскай вобласці Расіі і Смаленшчыны. На свята ў родны кут завітаў пісьменнік-зямляк, член Саюза пісьменнікаў Беларусі, ганаровы грамадзянін горада Касцюковічы Леанід Левановіч.
На сцэне – музычнае спаборніцтва паміж удзельнікамі конкурсу аўтарскай песні. Непадалёк – літаратурныя выстаўкі, якія таксама ацэньваліся прафесійным журы. Тут жа, на плошчы, размясцілі свае вырабы ўдзельнікі конкурсу дэкаратыўна-прыкладнога мастацтва. У гарадскім скверы працавала дзіцячая пляцоўка. Маладыя выканаўцы дарылі слухачам песні, вершы і інструментальныя кампазіцыі. У канцэртнай праграме “Галасы Прыбяседдзя” сваё майстэрства прадэманстравалі ўдзельнікі мастацкай самадзейнасці Крычаўскага, Горацкага, Хоцімскага і Клімавіцкага раёнаў.
Вечарыну паэзіі “На таленты багатая зямля” чакалі з хваляваннем і надзеяй усе ўдзельнікі. Бо пасля тэматычнай часткі пачалася ўрачыстая цырымонія ўзнагароджання пераможцаў конкурсаў.
Нечаканы і вельмі прыемны сюрпрыз для мясцовай паэтэсы Наталлі Азаранка падрыхтаваў старшыня Магілёўскага абласнога аддзялення Саюза пісьменнікаў Беларусі Уладзімір Дуктаў, які абвясціў, што яна прынятая ў СПБ. Увечары касцюкаўчан чакаў яшчэ адзін музычны падарунак – паўтарагадзінны канцэрт калектыву “Гуляй, казак” з Мінска.
Аўтар публікацыі: Наталля Дробышава, намеснік дырэктара дзяржаўнай установы культуры “Цэнтралізаваная клубная сістэма Касцюковіцкага раёна”.
Крыніца: газета “Літаратура і мастацтва”
Чытайце таксама: