Выдавецтва БДУ разам з аўтарам, Нінай Русаковіч, да 30-годдзя заслужанага фальклорна-этнаграфічнага ансамбля "Неруш" Беларускага дзяржаўнага ўніверсітэта выпусціла кнігу “Пра песню народную, “Неруш” і Валянціну”.
“Гэта вельмі дарагі падарунак, – упэўнена журналіст Валянціна Луцэвіч-Скарынкіна. – Даўно я так не радавалася кнізе... Хіба што ў дзяцінстве. Калі Ніна Русаковіч – чалавек таленавіты, неардынарны, настаўніца рускай мовы і літаратуры, аўтар кніг пра А. Пушкіна і С. Ясеніна – падарыла мне новую “Пра песню народную, “Неруш” і Валянціну”, якая незвычайна прыгожа аздоблена і багата ілюстравана, я не тое што прачытала, а “праглынула” яе за адзін дзень”.
Упершыню ў друку Беларусі даецца поўны творчы партрэт калектыву і яго кіраўніка – заслужанага дзеяча культуры Рэспублікі Беларусь Валянціны Фёдараўны Гладкай.
“Кніга выяўляе ўнікальны культуралагічны і гісторыка-дакументальны матэрыял, які падлягае далейшаму асэнсаванню новымі пакаленнямі даследчыкаў”, – адзначыў прафесар кафедры беларускай народна-песеннай творчасці Беларускага дзяржаўнага ўніверсітэта культуры і мастацтваў Уладзімір Зяневіч. Дэвіз жыцця Ніны Русаковіч: “Любоў мая – Паэзія і Песня”. Невыпадкова яна стала летапісцам ансамбля. Па-першае, яны з Валянцінай Гладкай – зямлячкі. Ніна – з вёскі Жукі, Валянціна – Праснакі Капыльскага раёна. Па-другое, ніводнаму самадзейнаму калектыву Беларусі пакуль не пашчасціла мець такога тонкага, глыбока зацікаўленага, неабыякавага і дасведчанага даследчыка.
Аўтар і “Неруш” цесна знітаваны, з'яўляючыся гарантамі беларускага адраджэння, духоўнай трываласці беларусаў, што пацвердзіла новая юбілейная праграма ансамбля, выкананая ў жанры народнага мюзікла “Вяселле ў Стараселлі”.
Гэтае дзейства трэба бачыць. У праграме – песні, танцы, музыка. Запісана яна У. Раговічам, Г. Цітовічам, Т. Варфаламеевай, М. Сіратой, В. Гладкай, удзельнікамі ансамбля.
Набыўшы гэты фаліянт (з двума дыскамі, на якіх – беларускія песні і танцы з рэпертуару “Неруша”), атрымаеце вялікую асалоду. Будзьма шанаваць свае аўтэнтычныя песні, якія ўзбагачаюць душу, бо яны захавалі чысціню нашых продкаў!
Прыходзяць радкі з “Зялёнага лістка на планеце Зямля” слыннага паэта і празаіка Янкі Сіпакова, які, на вялікі жаль, заўчасна пайшоў з жыцця: “Народныя спевакі збераглі народную песню. А ўжо песня выратавала нашу мову, а яна, у сваю чаргу, – дзяржаву, краіну, народ. Калі ёсць песня – значыць, жыве народ!”
Крыніца: газета “Звязда”