21 ліпеня ў Ганцавічах прайшло чарговае пасяджэнне абласнога камітэта па падрыхтоўцы і правядзенні Дня беларускага пісьменства.
Начальнік аддзела культуры Ганцавіцкага райвыканкама Ірына Марцінкевіч паведаміла, што ў пасяджэнні бралі ўдзел першы намеснік начальніка ўпраўлення культуры Брэсцкага аблвыканкама Тамара Паўлюковіч, спецыялісты абласнога грамадска-культурнага цэнтра.
Мерапрыемстваў чакаецца, як заўжды, шмат. 30 жніўня райцэнтр прыме навукова-творчую экспедыцыю “Дарога да святыняў” з Дабрадатным агнём ад Труны Гасподняй. 3-га верасня адбудзецца рэспубліканская навукова-практычная канферэнцыя “Ганцавіцкія чытанні-2011”, падчас якой плануецца абмеркаваць неабходнасць прыняцця Нацыянальнай праграмы развіцця чытання. 4-га – распачнуцца самі святкаванні Дня беларускага пісьменства.
У цэнтры Ганцавічаў адкрыецца Алея пісьменства, якую завершыць помнік Якубу Коласу: Пясняр, як вядома, распачаў сваю настаўніцкую дзейнасць у вёсцы Люсіна, што на Ганцавіччыне...
Горад рыхтуецца да свята. На наступным тыдні мяркуецца завяршыць рамонт дзіцячай і раённай бібліятэк. Да ладу даводзіцца ГДК. Дарэчы, па словах Ірыны Марцінкевіч, Міністэрства культуры Рэспублікі Беларусь ужо забяспечыла гэтую ўстанову камплектам гукаўзмацняльнай апаратуры.
У стадыі рэканструкцыі знаходзіцца кінатэатр. Неўзабаве ён ператворыцца ў Маладзёжны цэнтр з дысказалай, кавярняй і інтэрнэт-клубам. Капітальна рамантуецца раённы краязнаўчы музей. У раённых метадцэнтры і Доме рамёстваў вядуцца бягучыя рамонты.
Крыніца: газета “Культура”
