17 снежня ў актавай зале бібліятэкі адбыўся вечар-партрэт "Першы магілёўскі археограф і гісторык", прысвечаны 210-годдзю Мікалая Рыгоравіча Гартынскага.
М.Р. Гартынскі ўвайшоў у гісторыю Магілёва дзякуючы працы на ніве захавання дакументаў пра наша славутае мінулае – даследаваў і падрыхтаваў да выдання "Хроніку горада Магілёва", якая з’явілася першым і найбольш значным помнікам мясцовага летапісання і не мае аналагаў не толькі ў Беларусі, але і ва Усходняй Еўропе.
У вечары прыняла ўдзел М.А. Тарасава – вядучы навуковы супрацоўнік Магілёўскага абласнога краязнаўчага музея імя Е.Р. Раманава. Марына Анатольеўна паведаміла запрошаным на мерапрыемства студэнтам гістарычнага факультэта МДУ імя А.А. Куляшова пра старэйшага магілёўскага краязнаўца І. І. Філіповіча, заслуга якога яшчэ і ў тым, што ён першым знайшоў арыгінал "Хронікі горада Магілёва" ў Пецярбургскай публічнай бібліятэцы імя М. Салтыкова-Шчадрына (цяпер – Расійская нацыянальная бібліятэка).
М.А. Тарасава падарыла ў фонд бібліятэкі чарговы дзесяты выпуск гісторыка-краязнаўчага зборніка "Магілёўшчына". Зборнік, які выдае абласны краязнаўчы музей, прысвечаны разнастайным недастаткова вядомым і яркім старонкам гістарычнага мінулага Падняпроўя. У дзесяты выпуск увайшлі навуковыя праекты Крычаўскага і Клiчаўскага краязнаўчых музеяў, распрацоўкі асобных музейных заняткаў і экскурсій. Аўтары артыкулаў – супрацоўнікі краязнаўчага і абласных музеяў. У выданні змешчаны разнастайныя ілюстрацыйныя матэрыялы, якія адлюстроўваюць разглядаемую праблематыку і вынікі музейнай дзейнасці.
Будучыя гісторыкі з цікавасцю праслухалі паведамленне супрацоўнікаў аддзела беларускай і краязнаўчай літаратуры абласной бібліятэкі пра жыццё і прафесійную дзейнасць М.Р. Гартынскага, якое суправаджалася мультымедыйнай прэзентацыяй, а таксама агляд найбольш каштоўных краязнаўчых дакументаў, у т.л. электронных, якія абласная бібліятэка набыла ў Год роднай зямлі.
Мерапрыемства пашырыла веды моладзі і паслужыла штуршком для далейшага вывучэння гісторыі Магілёўшчыны.
