23 снежня ў Нацыянальнай бібліятэцы Беларусі прайшла пераднавагодняя калядная праграма “Зорнае сумоўе” фальклорнага ансамбля “Грамніцы”.
Фальклорны ансамбль “Грамніцы” існуе з 1993 года пад кіраўніцтвам прафесара кафедры народна-песеннай творчасці Беларускага дзяржаўнага універсітэта культуры і мастацтваў У.К. Зяневіча. Сваім мастацтвам удзельнікі ансамбля перадаюць характэрную для беларускага фальклору манеру выканання, спалучэнне традыцый народна-песеннай творчасці з эстраднай аранжыроўкай. З дзейнасцю ансамбля “Грамніцы” знаёмы не толькі ў Беларусі, але і за яе межамі – у Бельгіі, Галандыі, Германіі, Карэі, Францыі, Швецыі.
На сцэне канферэнц-залы Нацыянальнай бібліятэкі Беларусі прагучалі беларускія, украінскія, літоўскія, латышскія калядкі і славянскія народныя песні. Гледачы высока ацанілі музычную творчасць ансамбля і аддзячылі “Грамніцам” апладысментамі, усмешкамі і добрым настроем.
 |
 |
 |
 |
 |
 |
