Дзяржаўны дзеяч, палітык, дыпламат і кампазітар. Міхал Клеафас Агінскі – імя, якое ведае кожны, а яго паланэз “Развітанне з Радзімай” з’яўляецца найбольш вядомым музычным творам. Аднак не многія ведаюць, што кампазітарам было напісана больш за 70 твораў, сярод якіх оперы, вальсы і мазуркі.
Азнаёміцца з малавядомымі старонкамі творчасці Агінскага можна было на лекцыі-канцэрце, якая адбылася 14 лістапада ў зале нотных і аўдыявізуальных дакументаў. Кандыдат мастацтвазнаўства і старшы навуковы супрацоўнік Інстытута мастацтвазнаўства, этнаграфіі і фальклору імя К. Крапівы Ірына Леанідаўна Гарбушына не толькі прачытала пазнавальную лекцыю, але і выканала найбольш яркія творы кампазітара (“Паланэз Смерці”, паланэз “Сіротка”, “Патэтычны паланэз”). Слухачам была дадзена магчымасць параўнаць тры варыянты знакамітага паланеза Агінскага (аўтэнтычны, хрэстаматыйны і палегчаны).
Утульная зала, багата ілюстраваная тэматычная выстава, разнастайнасць цікавай інфармацыі, жывое выкананне выклікалі ў публікі непадробную цікавасць і дазволілі перажыць атмасферу музычнага салона.
Наступная лекцыя адбудзецца 21 лістапада ў 15:00.
Чакаем вас!
Уваход вольны (пры наяўнасці чытацкага білета або пропуску сацыякультурнага цэнтра).
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.