15 і 16 жніўня ў аздараўленчым лагеры “Палітэхнік”, размешчаным у маляўнічым кутку Мінскага раёна, адбылася выязная віртуальная экскурсія з цыкла “Славутыя імёны Бацькаўшчыны”.
Дзецям у інтэрактыўнай форме было прапанавана азнаёміцца з цікавымі фактамі пра Нацыянальную бібліятэку Беларусі, больш даведацца пра жыццё і творчасць Уладзіміра Караткевіча, віртуальна зазірнуць у тыя куткі нашай краіны, з якімі было звязана жыццё пісьменніка.
З велізарнай цікавасцю дзяўчаткі і хлопчыкі паглядзелі анімацыйны фільм “Аповесць мінулых гадоў” пра гісторыю паходжання гербаў гарадоў Мінска і Рагачова, прынялі актыўны ўдзел у выкананні творчых заданняў і адказалі на ўсе пытанні віктарыны.
Увазе экскурсантаў быў прадстаўлены кніжны агляд твораў Уладзіміра Караткевіча розных гадоў, а таксама выданні пра Мінск, Рагачоў, Оршу з фондаў Нацыянальнай бібліятэкі.
У канцы экскурсіі ўсіх чакалі памятныя сувеніры.
Замовіць выязную віртуальную экскурсію з цыкла “Славутыя імёны Бацькаўшчыны” па творчасці Янкі Купалы, Якуба Коласа, Янкі Маўра, Уладзіміра Караткевіча можна па тэлефонах: (8 017) 293 28 53, 293 29 66.
Запрашаем аздараўленчыя лагеры да супрацоўніцтва!
