4 снежня ў Гродзенскім дзяржаўным універсітэце імя Я. Купалы адбыўся семінар “Рэсурсы віртуальнай чытальнай залы Нацыянальнай бібліятэкі Беларусі і інфармацыйныя сэрвісы на платформе Web of Science для павышэння эфектыўнасці навуковай дзейнасці ВНУ”.
Арганізатарамі выступілі Нацыянальная бібліятэка Беларусі і кампанія Clarivate Analytics.
Перавагі выкарыстання рэсурсаў віртуальнай чытальнай залы (ВЧЗ) Нацыянальнай бібліятэкі Беларусі ў інфармацыйным забеспячэнні навуковай дзейнасці ВНУ раскрыў загадчык сектара інфармацыйнага забеспячэння інавацыйнай дзейнасці Нацыянальнай бібліятэкі Беларусі Вячаслаў Брычкоўскі. Ён таксама праінфармаваў прысутных аб сусветных электронных інфармацыйных рэсурсах, даступных партнёрам і карыстальнікам ВЧЗ.
Ірына Ціханкова, спецыяліст па навучанні кампаніі Clarivate Analytics, азнаёміла ўдзельнікаў семінара з новымі функцыянальнымі магчымасцямі інфармацыйных сэрвісаў платформы Web of Science. Вялікую цікавасць удзельнікаў выклікалі практычныя аспекты выкарыстання Web of Science для вырашэння шырокага кола задач у інфармацыйным забеспячэнні навуковай дзейнасці ВНУ, якія спрыяюць павышэнню ўзроўню публікацыйнай актыўнасці ВНУ, пашырэнню міжнароднага супрацоўніцтва, пошуку фінансавання для правядзення сумесных навуковых даследаванняў.
У працы семінара таксама прынялі ўдзел прадстаўнікі Гродзенскага дзяржаўнага медыцынскага ўніверсітэта і Гродзенскага дзяржаўнага аграрнага ўніверсітэта.
Матэрыял прадастаўлены аддзелам карпаратыўнага ўзаемадзеяння.