22 студзеня на базе Нацыянальнай бібліятэкі Беларусі адбылася вэб-канферэнцыя “Навуковыя даследаванні ў бібліятэках: дасягненні і перспектывы”, прымеркаваная да Дня беларускай навукі.
Арганізатарам мерапрыемства выступіла Нацыянальная бібліятэка Беларусі.
У канферэнцыі прынялі ўдзел звыш 70 дэлегатаў, у тым ліку каля 30 анлайн-удзельнікаў: дырэктары і вядучыя спецыялісты абласных і рэспубліканскіх бібліятэк Беларусі, прадстаўнікі ўстаноў адукацыі.
З прывітальным словам да ўдзельнікаў канферэнцыі звярнуўся дырэктар Нацыянальнай бібліятэкі Беларусі Матульскі Раман Сцяпанавіч. У сваім выступленні ён адзначыў ключавыя праблемы бібліятэчнай навукі, прыярытэтныя напрамкі бібліятэказнаўчых і кнігазнаўчых даследаванняў, пазначыў вектары далейшага развіцця даследчай дзейнасці бібліятэк.
У ходзе мерапрыемства ўдзельнікі дзяліліся назапашаным вопытам і вынікамі праведзеных даследаванняў. У фокусе абмеркавання былі праблемы, якія ўзнікаюць у бібліятэках пры ажыццяўленні навукова-даследчай дзейнасці; шляхі інтэграцыі бібліятэк у навукова-інфармацыйную прастору рэспублікі; патрэбнасць у развіцці навукова-даследчых кампетэнцый бібліятэчных кадраў краіны. Узнімаліся пытанні фінансавання даследаванняў, няхватка маладых даследчыцкіх кадраў у бібліятэках.
Матэрыялы канферэнцыі будуць пазней апублікаваны ў прафесійным часопісе “Біблятэчны свет”.
 |
 |
 |
