26 лістапада ў Дзелавым і культурным комплексе Пасольства Рэспублікі Беларусь у Расійскай Федэрацыі адбыўся ўрачысты вечар, прысвечаны 250-годдзю з дня нараджэння М.К. Агінскага.
Юбілей кампазітара, дыпламата, мецэната, палітыка, аўтара сусветна вядомага паланэза "Развітанне з Радзімай" па ініцыятыве Беларусі, Літвы і Польшчы быў уключаны ў Каляндар памятных дат ЮНЕСКА на 2015 год. На працягу года толькі ў Беларусі адбылося звыш ста рознага кшталту юбілейных мерапрыемстваў: канцэртаў, выставак, пленэраў, навуковых канферэнцый.
Нацыянальная бібліятэка Беларусі ўнесла свой уклад у святкаванне юбілею, у папулярызацыю асобы Міхала Клеафаса Агінскага, яго творчай спадчыны і стварыла электронны рэсурс "Служыць Радзіме…".
Адкрываючы святочнае мерапрыемства ў Маскве, саветнік-пасланнік пасольства Беларусі ў Расіі Юрый Ярашэвіч адзначыў, што творчая спадчына Агінскага стала агульнай для Беларусі і краін-суседзяў, яна сведчыць аб глыбокіх еўрапейскіх каранях беларускай культуры.
Загадчыца інфармацыйна-аналітычнага аддзела Нацыянальнай бібліятэкі Беларусі Людміла Гарбачова расказала пра новы мультымедыйны праект "Служыць Радзіме…". Менавіта ў духу служэння Радзіме, Айчыне праходзіла станаўленне М.К. Агінскага як дзяржаўнага, грамадскага дзеяча і творчай асобы. Рэсурс уключае вялікі аб’ём бібліяграфічнай і фактаграфічнай інфармацыі, гуказапісы твораў кампазітара, алічбаваныя копіі прыжыццёвых нотных выданняў, парыжскага выдання яго мемуараў на французскай мове, а таксама ў перакладзе на польскую мову з фондаў Нацыянальнай бібліятэкі, некаторых архіўных дакументаў, прадстаўленых Дзяржаўным музеем гісторыі тэатральнай і музычнай культуры Рэспублікі Беларусь.
У Мармуровай зале комплексу госці з цікавасцю азнаёміліся з кніжнай выстаўкай "Калі гучалі паланэзы" з фондаў Нацыянальнай бібліятэкі Беларусі. У юбілейнай экспазіцыі былі прадстаўлены навуковыя, навукова-папулярныя і літаратурна-мастацкія выданні, якія раскрываюць асноўныя этапы жыцця і творчай дзейнасці М.К. Агінскага, мастацтвазнаўчыя і краязнаўчыя манаграфіі і артыкулы вядомых беларускіх, а таксама замежных даследчыкаў – Ігара Бэлзы, Іва і Анджэя Залускіх, Пятра Станяка, Віктара Скарабагатава, Святланы Немагай, Сяргея Верамейчыка, Адама Мальдзіса і інш.
Прыцягвалі ўвагу гасцей прыжыццёвае выданне мемуараў М.К. Агінскага (1827) і першы іх пераклад на рускую мову (2015), аўтабіяграфія, уключаная ў зборнік "Колькі ў небе зор..." (2009), эсэ Уладзіміра Караткевіча "Песня з Паўночных Афін" (1965), апублікаванае ў часопісе "Маладосць", і драматызаваная паэма Алега Лойкі "Развітанне з Радзімай" (зборнік паэзіі "Ушанаванне", 2001).
Шматпланавая і плённая палітычная, культурная і мецэнацкая дзейнасць Агінскага ў 20-гадовы перыяд яго жыцця ў сваім маёнтку ў Залессі на Смаргоншчыне пакінула значны след у айчыннай гісторыі і культуры, і частка экспазіцыі была прысвечаная мінуламу і сучаснаму сядзібы.
Вечар завяршыўся ўнікальнай тэатральнай пастаноўкай Беларускай дзяржаўнай акадэміі музыкі, раней з поспехам прэзентаванай на сцэнічных пляцоўках Літвы, Польшчы і Францыі. Асноўнай ідэяй праекта стала ўзнаўленне ў розных музычных і сцэнічных жанрах атмасферы XIX стагоддзя. У якасці музычнага суправаджэння прагучалі творы вядомага кампазітара.
У мерапрыемстве прынялі ўдзел прадстаўнікі Міністэрства замежных спраў і Міністэрства культуры Расійскай Федэрацыі, найбуйнейшых расійскіх бібліятэк і музеяў, вядучых музычных тэатраў Масквы і культурных цэнтраў розных краін, а таксама прадстаўнікі беларускай дыяспары.