26 кастрычніка бібліятэкары краін СНД, удзельнікі праекта Камітэта па знешніх сувязях Санкт-Пецярбурга “Нашы бібліятэкі: руская мова як родная”, наведалі новыя бібліятэкі Санкт-Пецярбурга – “Сфера” і “Шафа”.
Смелыя дызайнерскія рашэнні і магутная канцэптуальная аснова, стэлажы-трансформеры, якія верцяцца, убудаваныя ў сталы-трансформеры камп’ютарныя маніторы, кабінеты “гультая” і “дызайнера”, станцыі браніравання і самаабслугоўвання, разумныя гардэробы і сэнсарныя краязнаўчыя даведнікі па бібліятэках свайго раёна – усё гэта новая рэальнасць кніжных скарбніц ЦБС Кіраўскага раёна Санкт-Пецярбурга.
Лейтматывам стварэння бібліятэкі “Сфера” выступае тэма падарожжа як інструмента пазнання ўсіх сфер жыцця. Фундаментальны прынцып працы “Сферы” – прынцып датычнасці, што пацвярджаецца удзелам будучых чытачоў у стварэнні бібліятэкі, фарміраванні першых выставачных экспазіцый, вызначэнні канцэпцыі топ-праектаў.
“Сфера” – яскравы прыклад спалучэння функцый класічнай бібліятэкі, пляцоўкі для нэтворкінгу і ўтульнага месца адпачынку: зала “Мікрасфера” – тэрыторыя сям’і і дзіцячай літаратуры, “Манасфера” – прастора каворкінгу і галіновай літаратуры, “Макрасфера” – цэнтр падзей і мастацкай літаратуры.
Бібліятэчная арт-рэзідэнцыя “Шафа” – гэта цэнтр кніжнай культуры і лабараторыя сучаснага мастацтва. Асноўныя напрамкі работы – літаратура, архітэктура, візуальныя і выканальніцкія мастацтвы. Эксклюзіўная бібліятэка валодае кабінетамі-студыямі для калектыўнай і аўтаномнай працы рэзідэнтаў, арыгінальнымі выставачнымі заламі: майстэрні “Форма” і адзінай у Расіі архітэктурнай фотагалерэяй “Кропка”. Тэатральна-мультымедыйная зала “Месца” створана для рэалізацыі эксперыментальных праектаў.
Арт-партал, фота-сцяна, дэма-каталог – гэта медыярэсурсы, якія спрыяюць пагружэнню наведвальнікаў у атмасферу творчасці, даследавання і самапазнання.
Кніжны фонд складае больш за 80 тысяч экзэмпляраў. Літаратура адносіцца да магістральнага кірунку. Штогадовы арт-форум міждысцыплінарнага ўзаемадзеяння з’яўляецца флагманскім праектам “Шафы”.
Матэрыял падрыхтаваны ўдзельніцай праекта Вольгай Палунчанкай, галоўным бібліёграфам АДІА НББ.
Чытайце таксама:
Спецыялізаваная культурна-адукацыйная праграма “Нашы бібліятэкі: руская мова як родная”
Рэсурснае забеспячэнне Цэнтральнай гарадской публічнай бібліятэкі імя У.У. Маякоўскага (г. Санкт-Пецярбург)
Супрацоўніцтва бібліятэк і тэатраў Санкт-Пецярбурга
