27 кастрычніка Нацыянальную бібліятэку наведала дэлегацыя Рэспублікі Саюз М’янма на чале з саюзным міністрам па справах саюзнага ўрада Ко Ко Хлайнам.
Візіт адбыўся ў рамках міжнароднай канферэнцыі высокага ўзроўню “Еўразійская бяспека: рэальнасць і перспектывы ў свеце, які трансфармуецца”.
Для ганаровых гасцей правялі азнаямленчую экскурсію, на якой пазнаёмілі са 100-гадовай гісторыяй бібліятэкі, яе фондамі, рэсурсамі і патэнцыялам найбуйнейшага сацыякультурнага цэнтра краіны.
У музеі кнігі госці азнаёміліся з рарытэтамі з калекцыі рукапісаў, старадрукаў і рэдкіх кніг, а таксама прыжыццёвымі выданнямі Францыска Скарыны, якія з’яўляюцца найкаштоўнейшай спадчынай нацыянальнай культуры Беларусі.
Супрацоўнікі бібліятэкі падзяліліся вопытам работы, асаблівасцямі дзейнасці бібліятэкі і праектамі, накіраванымі на захаванне і папулярызацыю культуры і гісторыі Беларусі.
Матэрыял пададзены аддзелам сувязей з грамадскасцю.