1 сакавіка ў Гомельскай абласной бібліятэцы імя У.І. Леніна прайшоў абласны семінар “Сучасная публічная бібліятэка: актуальныя праблемы, арыенціры развіцця”, удзельнікамі якога выступілі дырэктары бібліятэчных сетак вобласці.
Адкрыла семінар дырэктар Гомельскай абласной бібліятэкі Таццяна Забіяка, падкрэсліўшы важнасць і актуальнасць дадзенага мерапрыемства.
Кіраўнік аддзела культурна-асветніцкай работы галоўнага ўпраўлення ідэалагічнай работы, культуры і па справах моладзі Гомельскага аблвыканкама Анастасія Лысенка ў пачатку сустрэчы адзначыла ключавыя напрамкі, мэты і задачы дзейнасці бібліятэчнай сеткі рэгіёна ў 2023 годзе.
У рамках семінара спецыялісты абласной бібліятэкі падзяліліся сваім прафесійным вопытам, рэзюміравалі працу сеткі ў 2022 годзе, а таксама падвялі вынікі абласнога конкурсу “Бібліятэка, неабходная грамадству” і ўзнагародзілі пераможцаў.
Ад Нацыянальнай бібліятэкі Беларусі ў рабоце мерапрыемства ўзялі ўдзел супрацоўнікі навукова-даследчага аддзела бібліятэказнаўства.
Загадчыца сектара Анастасія Маслоўская, абапіраючыся на сабраныя статыстычныя даныя, пазнаёміла слухачоў з асноўнымі вынікамі дзейнасці публічных бібліятэк сістэмы Міністэрства культуры Рэспублікі Беларусь у мінулым годзе.
Галоўны бібліятэкар Вольга Какшынская праінфармавала калег аб навінках у сферы бібліятэчнага заканадаўства, якія сёлета ўступілі ў сілу, а таксама аб нарматыўных прававых дакументах, якія знаходзяцца ў працэсе распрацоўкі, азнаёміла з новымі метадычнымі рэкамендацыямі, падрыхтаванымі Нацыянальнай бібліятэкай па пытаннях аптымізацыі функцыянавання бібліятэк рэспублікі.
Ірына Кукета, галоўны бібліятэкар аддзела, распавяла аб навукова-даследчай дзейнасці Нацыянальнай бібліятэкі па вывучэнні гісторыі станаўлення і развіцця айчыннай бібліятэчнай галіны, прэзентавала электронны інфармацыйны рэсурс “Гісторыя бібліятэчнай справы Беларусі”, расказала пра асаблівасці карыстання і яго пошукавых магчымасцях, адзначыла значэнне кантэнту для краязнаўчай дзейнасці бібліятэк.
Напрыканцы семінара ўсе ўдзельнікі наведалі “Літаратурны салон княгіні Ірыны Паскевіч”, для спецыялістаў з Нацыянальнай бібліятэкі была арганізавана экскурсія па галоўных экспазіцыях краязнаўчага аддзела і музея рэдкай кнігі.
Матэрыял пададзены навукова-даследчым аддзелам бібліятэказнаўства.