“Палітра вясны” – гэта традыцыйная выстаўка-віншаванне Нацыянальнай бібліятэкі, прымеркаваная да Дня жанчын (8 сакавіка) і прызначаная нагадаць пра хуткае абуджэнне прыроды.
Сёлета вясенняя палітра прадстаўлена работамі лаўрэата Дзяржаўнай прэміі Беларусі Святланы Катковай (1941–2020) і выпускніцы Мінскага дзяржаўнага мастацкага вучылішча імя А.К. Глебава і Дюсельдорфской акадэміі мастацтваў Зоі Луцэвіч (нар. 1970). Адметныя беларускія мастачкі – маці і дачка – яўляюць сабой два позіркі на творчасць, дзве школы беларускага мастацтва, адну надзвычайна творчую сям’ю.
Святлана Каткова і Зоя Луцэвіч – прадстаўнікі таленавітай дынастыі, мастакі не ў першым пакаленні. Вядомы педагог Сяргей Каткоў, які стаяў ля вытокаў сучаснага выяўленчага мастацтва, – тата Святланы і дзядуля Зоі. Менавіта Сяргей Каткоў – выкладчык выяўленчай студыі, з якой выйшлі знакавыя беларускія мастакі. Шмат з кім Святлана была знаёмая і сябравала, у некаторых вучылася.
Работы яркай прадстаўніцы сучаснага беларускага жывапісу Зоі Луцэвіч адкрываюць экспазіцыю. Яна шырока вядома беларускай і сусветнай публіцы як аўтар канцэптуальных мастацкіх праектаў, напоўненых наватарствам і глыбінёй індывідуальнага стылю. Кожная яе работа ў экспазіцыі – стылістычна, каларыстычна, экспрэсіўна і тэхнічна разнастайная падзея. Тэмы Зоі нават у прасторы кветкавых кампазіцый – жыццё, час, адносіны, скон. Цёмныя колеры і флюарэсцэнтныя фарбы – аўтар выкарыстоўвае нечаканыя сродкі выразнасці. Работы Зоі сустракаюць і ўражваюць гледача багаццем колераў, гармоніяй, выразнасцю і элегантнасцю прыёмаў і спалучэнняў, магутнасцю і вастрынёй.
Жывапісныя палотны Святланы Катковай, працягваючы экспазіцыю, здзіўляюць наведвальніка нечаканасцю і авангарднасцю. Майстэрства аўтара зараджалася ў рэчышчы савецкага мастацтва, але заўжды насіла адметны самабытны характар і аказала істотнае ўздзеянне на фарміраванне беларускай мастацкай школы. У жывапісных работах адчуваецца дэкаратыўнасць. Кветкавыя кампазіцыі ўражваюць смелым спалучэннем колераў, сонечным святлом, свежымі, яснымі фарбамі, фантазіяй адносна формаў. Аўтар нібыта лёгка і таленавіта жартуе з гледачамі, дзеліцца з імі сваімі настроем і майстэрствам, непасрэднасцю і шчырасцю. Работам Святланы ўласцівы паэтычнасць і музыкальнасць, пяшчота аўтарскай думкі, глыбіня мастацкага выказвання.
Работы мастачак нагадваюць сімфонію святла і колеру, напоўнены тонкай жаноцкай філасофіяй і лірычнасцю, адчуваннем жыцця і аптымізму. Яскравыя, светлыя, жыццясцвярджальныя, задуменныя, настальгічныя, філасофскія кампазіцыі ззяюць у галерэі кожная сваім святлом, гукаюць вясну і абвяшчаюць яе хуткі надыход.
Запрашаем наведаць выстаўку да 10 мая 2023 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам галерэйна-выставачнай дзейнасці.