14 сакавіка ў Мінскай абласной бібліятэцы імя А.С. Пушкіна прайшла абласная нарада дырэктараў сетак публічных бібліятэк “Стан і асноўныя напрамкі развіцця бібліятэчнай справы ў бібліятэках вобласці”.
На мерапрыемстве былі падведзены вынікі работы бібліятэк за 2018 год, абмеркаваны надзённыя праблемы і намечаны перспектывы развіцця бібліятэчнай справы Мінскай вобласці.
Для ўдзельнікаў нарады ў рамках Года малой радзімы дырэктар Нацыянальнай бібліятэкі Беларусі, доктар педагагічных навук, прафесар Раман Матульскі правёў адкрытую лекцыю па тэме “Тэндэнцыі і асаблівасці развіцця кніжнай культуры Беларусі ў XI–XX стст. у кантэксце агульнаеўрапейскай і нацыянальнай гісторыі”.
На падставе вялікай колькасці дакументальных і статыстычных даных і ў цеснай сувязі з культурна-гістарычным развіццём краіны Раман Матульскі разгледзеў гісторыю развіцця кніжнай і бібліятэчнай справы ў Беларусі з ІХ ст. да пачатку ХХ ст., а таксама развіццё бібліятэчнай і выдавецкай справы Беларусі ў савецкі перыяд (1917–1991 гг.).
На лекцыі дырэктар Нацыянальнай бібліятэкі падкрэсліў, што сучасны свет патрабуе ад Беларусі фарміравання культурнага імунітэту, а яго аснова – гісторыя, вытокі якой захоўвае наша багатая кніжная спадчына.
Матэрыял прадастаўлены навукова-даследчым аддзелам бібліятэказнаўства.