Больш за 600 экзэмпляраў кніг з фонду ўнутрырэспубліканскага дакументаабмену і пераразмеркавання дакументаў аддзела камплектавання фондаў Нацыянальнай бібліятэкі Беларусі ў чарговы раз былі перададзены бібліятэцы папраўчай калоніі № 13 г. Глыбокае (Віцебская вобласць).
Перадача выданняў рэалізуецца ў рамках плана арганізацыйных мерапрыемстваў грамадскага савета пры Міністэрстве ўнутраных спраў. Акцыя “Добрая кніга – лепшы сябар у жыцці” накіравана на папаўненне фондаў бібліятэк устаноў пенітэнцыярнай сістэмы Рэспублікі Беларусь.
У ходзе акцыі бібліятэкам следчых ізалятараў, папраўчых устаноў, турмаў, лячэбна-працоўных прафілакторыяў Мінска, Брэста, Гомеля, Магілёва, Віцебска, Оршы, Дзяржынска, Бабруйска, Горак, Жодзіна, Наваполацка і іншых гарадоў на працягу 2018 года перададзена больш за 3,5 тысячы экзэмпляраў кніг – энцыклапедычныя і даведачныя выданні, гісторыка-дакументальныя творы, навучальная, юрыдычная літаратура, грамадска-палітычныя, навукова-папулярныя і мастацкія часопісы.