15 лістапада інфармацыйныя рэсурсы Нацыянальнай бібліятэкі Беларусі і магчымасці іх выкарыстання ў інфармацыйным забеспячэнні вышэйшай адукацыі былі прадстаўлены ў Магілёўскім дзяржаўным універсітэце імя А.А. Куляшова.
Аб карпаратыўных праектах нашай бібліятэкі слухачам расказала Таццяна Кузьмініч, намеснік дырэктара па інфармацыйных рэсурсах. Яна прадставіла магчымасці работы са Зводным электронным каталогам бібліятэк Беларусі, электронным рэсурсам “Нацыянальная бібліяграфія”, базай даных “Вучоныя Беларусі” – праектамі, якія Нацыянальная бібліятэка стварае сумесна з вядучымі бібліятэкамі краіны. Гэтыя інфармацыйныя рэсурсы закліканы аб’яднаць і захаваць неацэнную інфармацыю аб дакументнай спадчыне Беларусі, развіцці нацыянальнай навукі і ўкладзе беларускіх вучоных у навуку сусветную.
Асаблівую ролю ў развіцці вышэйшай адукацыі і навукі ў ВНУ адыгрывае якаснае інфармацыйнае забеспячэнне навукова-адукацыйнага працэсу. Сёння немагчыма ўявіць развіццё адукацыі і навукі без выкарыстання сусветнага вопыту і самых новых дасягненняў ва ўсіх сферах чалавечай дзейнасці. Зрабіць гэтую інфармацыю даступнай для кожнага студэнта, выкладчыка і вучонага закліканы яшчэ адзін карпаратыўны праект Нацыянальнай бібліятэкі – віртуальная чытальная зала (ВЧЗ).
ВЧЗ прадстаўляе сваім удзельнікам лепшыя інфармацыйныя рэсурсы свету. З дапамогай ВЧЗ любы чытач у бібліятэцы свайго ўніверсітэта атрымлівае доступ да інфармацыі, адкрытай вучоным вядучых універсітэтаў і навуковых устаноў свету. Базы даных, прадстаўленыя ў ВЧЗ, прапануюць якасны навукова-адукацыйны кантэнт, а таксама інфармацыйна-аналітычны і навукаметрычны інструментарый для планавання, ацэнкі і прадстаўлення вынікаў навуковай дзейнасці.
Адным з інфармацыйных рэсурсаў, які забяспечвае доступ да шырокага спектру рускамоўных перыядычных выданняў па ўсіх галінах ведаў, з’яўляецца платформа East View. Магчымасці яе выкарыстання ўдзельнікам семінара раскрыў прадстаўнік кампаніі ІВІС Дзмітрый Ушанаў.
У семінары прынялі ўдзел прадстаўнікі Магілёўскага дзяржаўнага ўніверсітэта імя А.А. Куляшова, Магілёўскага інстытута Міністэрства ўнутраных спраў Рэспублікі Беларусь, Магілёўскага ўніверсітэта харчавання, Беларуска-Расійскага ўніверсітэта, Магілёўскай абласной бібліятэкі імя У.І. Леніна.
Матэрыял падрыхтаваны аддзелам карпаратыўнага ўзаемадзеяння.
