19 лістапада ў бібліятэцы прайшла прэзентацыя першага выпуску серыі мультымедыйных выданняў “Партызанскі архіў”.
Першым выпускам у серыі “Партызанскі архіў” з’яўляецца мультымедыйнае выданне “Аператыўныя і разведвальныя зводкі Беларускага штаба партызанскага руху: 1944 год”. Асноўныя падзеі баявой і разведвальнай дзейнасці беларускіх партызан прадстаўлены ў электронных копіях архіўных дакументаў. Большасць з іх апублікаваны ўпершыню.
У мерапрыемстве ўзялі ўдзел дырэктар Нацыянальнай бібліятэкі Беларусі Раман Матульскі, дырэктар Нацыянальнага архіва Рэспублікі Беларусь Андрэй Дземянюк, рэцэнзент выдання Анатоль Шаркоў, намеснік загадчыка аддзела публікацый Нацыянальнага архіва Рэспублікі Беларусь Святаслаў Кулінок.
У канцы прэзентацыі начальнік упраўлення інфармацыі, прэс-сакратар галоўнага ўпраўлення ідэалагічнай працы Міністэрства абароны Рэспублікі Беларусь палкоўнік Уладзімір Макараў правёў урачыстае ўзнагароджанне ўдзельнікаў праекта юбілейнымі медалямі "75 гадоў вызвалення Беларусі ад нямецка-фашысцкіх захопнікаў". Імі былі адзначаны дырэктар Нацыянальнай бібліятэкі Раман Матульскі і яго намеснік па навуковай рабоце і выдавецкай дзейнасці Аляксандр Суша. Яшчэ адзін медаль уручылі прадстаўніку Нацыянальнага архіва Святаславу Кулінку.
На мерапрыемстве для гасцей выступаў саліст Акадэмічнага ансамбля песні і танца Узброеных сіл Рэспублікі Беларусь, заслужаны артыст Рэспублікі Беларусь Леанід Некрашэвіч.
Выдавецкі праект “Партызанскі архіў” ініцыявалі Нацыянальная бібліятэка Беларусі і Нацыянальны архіў Рэспублікі Беларусь да 75-годдзя вызвалення Беларусі ад нацысцкіх захопнікаў. У наступным годзе плануецца працягнуць серыю матэрыялаў партызанскага руху за 1942 і 1943 гады.
Матэрыял пададзены аддзелам сувязей з грамадскасцю.