15 верасня ў Нацыянальнай бібліятэцы Беларусі прайшлі мерапрыемствы, прысвечаныя Дню бібліятэк.
Пачаўся дзень са святочнага канцэрта для супрацоўнікаў бібліятэкі. У рамках мерапрыемства адбылася цырымонія ўручэння ўзнагарод пераможцам конкурсу прафесійнага майстэрства на званне “Лепшы па прафесіі” сярод супрацоўнікаў бібліятэкі, а таксама цырымонія прысвячэння маладых спецыялістаў.
Вясёлы, заўзяты тон мерапрыемству задавалі чароўныя вядучыя – супрацоўнікі Нацыянальнай бібліятэкі Беларусі Яніна Варанко і Уладзіслаў Някрасаў.
Вакал маладога таленавітага выканаўца Аляксандра Сабалеўскага, кранальная песня ў выкананні супрацоўніцы бібліятэкі Наталлі Жывалкоўскай і жартоўная мініяцюра “Гэта – бібліятэка” зарадзілі станоўчай энергіяй усіх гасцей у зале. Сапраўдным падарункам і сюрпрызам для супрацоўнікаў Нацыянальнай бібліятэкі Беларусі ў гэты святочны дзень стала выступленне канцэртнага аркестра “Няміга”.
Прадоўжылася святкаванне Дня бібліятэк урачыстай цырымоніяй ускладання кветак да помніка Ф. Скарыне на плошчы перад Нацыянальнай бібліятэкай Беларусі. У святкаванні ўзялі ўдзел прадстаўнікі дзяржаўных органаў у сферы культуры і бібліятэчнай справы, бібліятэчнай грамадскасці з розных рэгіёнаў Беларусі.
Са святам бібліятэк прысутных павіншавалі намеснік міністра культуры Рэспублікі Беларусь Тадэвуш Стружэцкі, старшыня Беларускага прафсаюза работнікаў культуры Наталля Аўдзеева, начальнік упраўлення культуры Мінгарвыканкама Віталіна Рудзікава, намеснік старшыні ГА “Беларуская бібліятэчная асацыяцыя” Алена Кубышкіна, дырэктар Нацыянальнай бібліятэкі Беларусі Раман Матульскі.
З творчымі нумарамі выступілі заслужаны аматарскі калектыў Рэспублікі Беларусь ансамбль беларускай песні “Церніца” і ўзорны танцавальны калектыў Харэаграфічнай школы № 1 г. Мінска “Весялушка”.
У рамках святкавання Дня бібліятэк адбылося адкрыццё выстаўкі “Сам сабе мастак”. Гэта сумесны праект Беларускай бібліятэчнай асацыяцыі і Нацыянальнай бібліятэкі Беларусі. Выстаўка падрыхтавана па выніках конкурсу, які праводзіўся сярод супрацоўнікаў бібліятэк усіх рэгіёнаў краіны. У экспазіцыю ўвайшло каля 70 прац, выкананых таленавітымі і крэатыўнымі бібліятэкарамі ў розных відах мастацтва – жывапісе, скульптуры, ткацтве, вышыўцы, дызайне адзення. Кампетэнтным журы былі адабраны лепшыя работы ў некалькіх намінацыях, пераможцы якіх атрымалі ўзнагароды.
Выстаўка “Сам сабе мастак” размешчана ў галерэі “Ракурс” Нацыянальнай бібліятэкі Беларусі і будзе доўжыцца да 10 кастрычніка 2011 г.