15 мая ў многіх краінах адзначаюць Міжнародны дзень сям’і. Нацыянальная бібліятэка Беларусі не засталася ў баку.
Дзецям, мамам, татам, бабулям і дзядулям прапанавалі паўдзельнічаць у смартмобе: сфатаграфавацца або зняць відэа падчас чытання ў сямейным коле і апублікаваць пост у Instagram з хэштэгам # мамапапаячитающаясемья. Усе, хто прыняў удзел у акцыі, былі запрошаны на экскурсію “Ажыўшыя кнігі” ў бібліятэку.
Экскурсія “Ажыўшыя кнігі” цудоўна падыходзіць для таго, каб адзначыць сямейнае свята. Падчас яе госці змаглі пазнаёміцца з будынкам галоўнай бібліятэкі краіны, заказаць праз электронны каталог любімыя кнігі і пагартаць іх, паглядзець на інтэрактыўнай панэлі мультфільмы, прысвечаныя гісторыі гербаў беларускіх гарадоў, скласці тэматычныя пазлы, памаляваць, убачыць рукапісныя і старадрукаваныя кнігі і параўнаць іх з самымі сучаснымі кнігамі 4D. Кнігі з дапоўненай рэальнасцю дзеці і дарослыя “ажывілі” з дапамогай электронных планшэтаў.
На закрытай агляднай пляцоўцы кожная сям’я змагла сфатаграфавацца ў святочнай фотазоне. Час прайшоў непрыметна.
Запрашаем і вас на сямейныя экскурсіі ў Нацыянальную бібліятэку Беларусі!
Матэрыял прадастаўлены аддзелам экскурсійна-метадычнай работы.
