15 верасня скарбніцы кніг нашай краіны адзначаюць сваё прафесійнае свята – Дзень бібліятэк.
Устаноўлены Указам Прэзідэнта Рэспублікі Беларусь у 2001 годзе святочны дзень сведчыць пра ўвагу дзяржавы і грамадства да бібліятэк як да найважнейшага элемента інфармацыйнай прасторы.
Сёлета Нацыянальная бібліятэка Беларусі святкуе юбілей – 95-годдзе з дня заснавання. За гэтай датай – багатая гісторыя, змены, рух наперад, праца вялікай колькасці прафесіяналаў і адданых сваёй справе людзей. Вельмі сімвалічна, што юбілей бібліятэкі адзначаецца разам з яшчэ адной знакавай падзеяй – 500-годдзем беларускага кнігадрукавання.
Прэзідэнт Рэспублікі Беларусь Аляксандр Лукашэнка адрасаваў шчырыя віншаванні з нагоды знамянальнага юбілею калектыву Нацыянальнай бібліятэкі Беларусі і пажадаў поспехаў і плёну ў адказнай і высакароднай місіі, моцнага здароўя, шчасця і дабрабыту!